Ministru Finansa, Fernando Hanjam, akompaña husi Diretór Jerál Planeamentu no Orsamentu Ministériu Finansa, Januário da Gama, halo distribuisaun tetu OJE 2020 ba liña ministériu, iha salaun MF, Aitarak-Laran, kinta (02/07). Imajen/MF

DILI, 02 jullu 2020 (TATOLI) – Ministériu Finansa konvoka sesaun traballu atu halo diseminasaun kona-ba regra, prosedimentu no distribuisaun tetu orsamentu ba liña ministériu, institusaun, no servisu fundu autónoma inklui munisípiu sira atu hahú inisia preparasaun Orsamentu Jerál Estadu (OJE) 2020.

Sesaun ne’e realiza hafoin Konsellu Ministru iha loron 29 juñu halo aprovasaun tetu agregadu, dizagregadu, no kalendáriu proposta OJE 2020 no 2021.

Tuir nota imprensa ne’ebé Agência Tatoli asesu, tetu agregadu OJE 2020 hamutuk millaun $1.492,3, ne’ebé fahe ba verba saláriu no vensimentu millaun $204,5, bens no servisu millaun $558,6, transferénsia públika millaun $407,3, kapitál menór millaun $6,7, no kapitál dezenvolvimentu millaun $315,2.

Notísia Relevante: Governu Aprova Tetu Proposta OJE 2020 Millaun $1.492,3, Loron 15 Setembru Submete ba PN

Tetu agregadu ne’ebé fahe ba kategoria lima, halo ona kobertura ba despeza Fundu COVID-19 ho totál millaun $220, impréstimu millaun $60, Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM, TL) millaun $76 no apoiu husi Uniaun Europeia (DBS) millaun $7,5.

“Determinasaun tetu agregadu no dizagregadu halo reflesaun ba kapasidade ezekusaun iha períodu rejime duodesimál husi janeiru to’o maiu. Nune’e mós, projesaun ba alokasaun rejime duodesimál husi juñu to’o outubru no alokasaun foun inklui medida esensiál sira entre novembru to’o dezembru 2020,” refere nota.

Kona-ba fundu tomak, Estadu Timor-Leste enfrenta situasaun surtu COVID-19 no aplikasaun rejime duodesimál iha tempu ne’ebé naruk, tanba ne’e Governu deside atu la opta prioridade ne’ebé ho alvu a’as Iiu, nune’e konsentrasaun programa prioridode ba OJE 2020 mak atu halo kontinuasaun programa no atividade husi 2019, medida esensiál ho obligasaun legál no kontratuál, inklui konsentra mós ba prevensaun no mitigasaun pandemia COVlD-19.

Programa Prioridade ba tinan fiskal 2020 ne’ebé kontektualiza tuir situasaun tinan ne’e mak refere liu ba estabilizasaun setór sosiál, setór ekonomia no reforma sira iho área administrasaun públika, reforma ekonomia, reforma judisiáriu no reforma jestaun finansa Públika.

Iha konvokasaun sesaun traballu ne’e, MF fó de’it fulan ida ba liña ministériu no institusaun sira atu hato’o filafali ba Gabinete Primeiru-Ministru hodi konklui ninia verifikasaun no analiza finál hodi aprezenta no halo aprovosaun finál.

Tuir kalendáriu ne’ebé Konsellu Ministru aprova, sei submete Proposta OJE 2020 iha Parlamentu Nasionál iha loron 15 setembru 2020, tamba ne’e husi distribuisaun tetu orsamentu ne’ebé ohin realiza ona, ministériu no instituisoun sira iha de’it tempu fulan-ida atu prepara no konklui planu atividade ho alokasaun orsamentu tuir tetu ne’ebé atribui ona.

Nune’e, MF no Gabinete Primeiru-Ministru liuhosi Unidade Planeamentu, Monitorizasaun no Avaliasaun (UPMA) sei konklui ninia verifikasaun no analiza hodi aprezenta no halo aprovosaun finál iha Konsellu Ministru molok prosede atu finaliza dokumentu suplementár ba OJE 2020.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here