Fahi-luhan. Imajen google

DILI, 02 jullu 2020 (TATOLI)–Xefe Departamentu Jestaun Merkadória Munisípiu Dili, Berta Santa Gonçalves Vieira, hateten durante Estadu Emerjénsia ekipa jestaun merkadória sobu fahi-luhan 80 ne’ebé mak harii besik iha Sentru Saúde Bairru dos Grilhos, Postu Administrativu Na’in Feto, Munisípiu Dili, tanba ema mak keixa katak fatin ne’e la seguru no bele hamosu moras. 

“Durante Estadu Emerjénsia, ami simu keixa hosi komunidade balun iha Bairru dos Grilhos nian katak fahi-luhan foer no iis hodi hamosu moras tanba kauza hosi hosi fahi-teen. Entaun ho ida-ne’e, ami ba sobu tiha fahi-luhan ne’e hamutuk 80 iha ne’ebá,” dehan Berta Santa Gonçalves Vieira ba Agência TATOLI iha nia servisu fatin, Mascarinhaa, Dili, kinta ne’e.

Xefe Jestaun ne’e hatutan, ekipa jestaun merkadória tenke foti desizaun ida katak tenke sobu tiha fahi-luhan ne’e tanba besik loos Sentru Saúde ida iha ne’ebá.

“Ami sobu tiha maibé ami kontinua ba halo operasaun ba fatin ne’ebé mak sobu ona, se lae sira halo fila fali de’it fahi-luhan entaun ami tenke halo opersaun no halo kontrolu. Bainhira liu loron tolu, guarda jestaun tenke ba haree fali, nune’e bele asegura ita-nia saúde hosi foer hirak ne’e,” nia dehan. 

Nia hateten, bainhira guarda jestaun sobu mak sira kontinua haki’ak fahi maka guarda tenke foti medida katak hamate animál iha nia luhan laran.

Maibé, nia informa, durante seidauk hamate animál iha nia luhan laran tanba komunidade sempre halo tuir regra ne’ebé mak fó sai no sempre koopera hamutuk.

Aleinde ida ne’e, nia dehan, iha komunidade balun iha Dili hakarak haki’ak fahi iha uma-laran hamutuk ho ema, entaun ida ne’e susar atu hadook hosi moras. Maibé jestaun merkadória fó  ona atensaun atu labele haki’ak fahi iha uma-laran no labele haki’ak besik iha uma ninin.

Nia informa, fatin sira ne’ebé mak jestaun merkadória deteta no komunidade sira haki’ak animál hanesan fahi ne’e iha área Bemori, Bairru Pité, Fatumeta, Bairru dos Grilhos.

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here