Diretór Ezekutivu SERVE, Florêncio Sanches. Imajen Tatoli/António Gonçalves

DILI, 02 jullu 2020 (TATOLI) – Diretór Ezekutivu Servisu  Rejistu Verifisaun Emprezariál  (SERVE) Florêncio Sanches, informa durante implementasaun Estadu Emerjénsia (EE) kauza surtu COVID-19, empreza lima maka suspende sira-nia atividade ekonómika.

“Durante loron 90 nia-laran, laiha kompañia maka suspende totál sira-nia atividade maibé tanba de’it Estadu Emerjénsia no COVID-19 sira tenke suspende atividade ekonómika maibé agora daudaun sira atu loke fali sira-nia atividade ekonómika tanba sira hakarak halo fali vida emprezáriu ho normál, tanba ne’e ita apresia tebes inisiativa ida-ne’e,” tenik Diretór Ezekutivu SERVE ba Agência Tatoli, iha Palásiu Governu, kinta ne’e.

Nia dehan, SERVE rejista empreza ne’ebé suspende atividade ekonómika durante EE maka ida husi empreza internasionál no haat husi empreza lokál.

Tuir Florêncio Sanches katak, iha emprezáriu balun suspende atividade maibé balun mantein atividade ho normál.

“Sira maka hakarak duni halo kontribuisaun ba Estadu liuhosi atividade ekonómika. Lei fó dalan atubele loke filafali atividade ne’ebé empreza suspende maibé nain ba empreza labele taka ka suspende totalmente sira-nia atividade kompañia tanba lei la fó dalan,” nia akresenta.

Dirijente ne’e subliña, bainhira akontese empreza taka totál, lei la fó dalan atu loke filafali empreza no bainhira sei loke empreza foun tenki harii fali entidade foun.

Hahú husi janeiru to’o dezembru 2019, SERVE rejista empreza hamutuk 3.326, kompostu husi  Empresário em Nome Individual (ENIN) hamutuk 1.703, Sociedade Unipessoal por Quotas Limitada (Unipessoal,Lda) 1.129, Sociedade por Quotas Limitada (Lda) 475, Sociedade Anônima (S.A) 13, Representação Permanente (R.P) 6, no Empresa Pública 0.

Enkuantu, totál empreza ne’ebé rejista komesa husi 2013 to’o 2019 mak 27.386.

Rejistu komersiál husi janeiru to’o novembru 2018 hamutuk 3.065 ho tipu mak ENIN 1.590, Unipessoal, Lda, 1.070, Lda 387, S.A 11, R.P 6, no E.P 1.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here