Dom Carlos Filipe Ximenes Belo, SDB. Imajen hosi pájina FB

INGLATERRA, 2 jullu 2020 (TATOLI) – Amu Bispu, Carlos Filipe Ximenes Belo SDB, hosi Portugál hakerek karta ida ba Timoroan sira ne’ebé hela iha Inglaterra atu rezolve problema ho dalan diálogu, hakiak rekonsiliasaun hodi moris hakmatek, hodi kontinua kontribui ba dezenvolvimentu ekonomia iha Timor-Leste, liuliu ba família sira iha Timor.

Tuir mai kontiúdu kumpletu hosi karta ne’ebé Tatoli simu hosi kontribuente iha Inglaterra, Celso Oliveira.

Ba maluk no belun Timor oan sira iha Schuntrope

Uluk knana’in atan ha’u hato’o kumprimentus ba imi ida-idak, ba imi nia família no ba komunidade tomak. Ha’u hein imi di’ak nafatin; di’ak iha serbisu fatin (fábrika), di’ak iha uma-laran no di’ak iha rai Schuntrope.

Molok hakerek surat simples ida ne’e, ha’u hanoin hikas loron tolu ne’ebé ita hasoru malu iha Schuntrope, wainhira Komisaun Organizadora Falintil Cup –Setembru 2019, konvida atan ha’u atu ba assiste, halo reuniaun ho imi no reza missa iha Uma Kreda parókia nian hamutuk ho imi.

Ha’u mos la haluha vizita hosi señor Brigadeiru-Jenerál Sabika ho nia família. Tempu ne’ebá, ha’u kontente bele hasoru imi; koa’lia ho ema balu; assiste jogu futebol, no han-hemu hamtuk ho imi. Fila fali mai Portugál, ha’u la haluha reza nafatin ba imi. Iha ha’u nia orasaun no missa, atan ha’u husu ba Na’i Maromak atu haraik bensaun ba imi, fó isin di’ak nafatin, no tulun imi hetan felisidade tomak iha Inglaterra!

Dala barak ha’u hanoin imi hotu ne’ebé husik ita nia rai doben Timor-Lorosa’e, hodi ba rai liur, atu buka serbisu, atu nune’e bele manán osan uitoan, hodi haree oan sira nia eskola no sira nia edukasaun; imi mos kontribui maka’as ba dezenvolvimetu Timor-Leste nian, hodi haruka osan ba rai laran atu tulun inan-aman, maun-alin, no parente sira; ho osan ne’ebé imi manán ho imi nia kósar-been no imi nia sakrifisiu, imi bele halo uma-mutin, sosa motór ho karreta, harii kios no halo buat seluk tan.

Tanba ne’e, dala ruma ha’u tuur hanoin, imi mak “eroi/pahlawan” ba Timor-Leste nia dezenvolvimentu.

Maibé, maluk no belun sira: Dala barak, iha malae nia rai, buat balu la’o ladun di’ak: tanba diferensa kulturál, tanba lian inglés, tanba situasaun serbisu ne’ebé todan [orário, viajen, dissiplina] tanba moras, me’ar, gripe, no susar oin- oin; tan ba buat hirak ne’e hotu, halo imi kole, halo imi hirus malu, haree malu la di’ak.

Dala ruma, Ita timor oan ran manas! Tanba ne’e, ita baku malu, tá malu no hakanek malu. Dala ruma ita istóri ho maluk timor oan rasik, eh ita ‘runggu-rangga’, ho malae rai-nain, ka ho ema imigrante seluk. Ho ita nia hahalok ida ne’e, ita halo kole polísia sira, fó todan ba ema iha ospitál, no kadeia; liu liu, ita timor oan ne’ebé luta ba indepéndensia no liberdade, ita fó impressaun aat ba komunidade iha ne’ebé imi hela ba.

Ho surat ida ne’e, ha’u husu de’it atu imi rezolve problema sira ho diálogu, ho tuur-hamutuk hodi ko’alia, no buka dame. Hanesan sarani, ita reza, ita perdua malu, ita reza ba malu. Ha’u hatene katak, maske imi kole, tan serbisu todan, tan ba problema iha uma-laran, imi seii ba tuir missa iha Uma-kreda, reza tersu iha uma ka iha família sira nia uma.

Orasaun importante tebes. Serbisu iha fábrika ne’e orasaun ida ona; haree uma-laran no oan sira nia di’ak, ne’e orasaun ida ona!

Maibé, ita mos sei harohan iha kapela ka uma-kreda hamutuk ho sarani seluk. Tanba ho orasaun ita bele hakiak rekonsiliasaun, ba dame-malu, moris iha hakmatek laran, no serbisu di’ak liutan.

Atan ha’u reza ba imi tomak, no husu Na’i Maromak Espíritu Santu atu fó neon kman no espíritu damen-na’in nian ba imi tomak. Atan ha’u husu ba Nai Feto, Virgen Maria, Maromak nia Inan no ita nia Inan, atu haraik grasa wa’in no isin-di’ak ba foin sa’e sira, labarik no kosok-aon sira hotu.

Fó bensa ba Uma-Kain ida-idak iha Schuntrope, no komunidade Timor tomak. Molok remata, atan ha’u hato’o kumprimentu no hakoak metin ba imi ida-idak.

Ha’u mos la haluha husu imi nia orasaun mai atan ha’u.

My best greetings for you all!

Yours sincerely,

Lisboa, 1 de julho de 2020

Dom Carlos Filipe Ximenes Belo

HAKEREK NO HATÁN

Please enter your comment!
Please enter your name here