Hakerek nain, Elidio Agusto Guterres.

(Refleksaun ba Proposta Esbosu Lei Kriminaliza Difamasaun iha Tempu Post-Modernizmu)

Hosi:

Elidio Agusto Guterres

Artigu ida-ne’e hanesan reflesaun pesoál ba proposta esbosu-lei kriminaliza difamasaun ne’ebé Governu liuhosi Ministru Justisa prodús no públika iha mídia sira iha Timor-Leste, iha loron hirak liubá. Iha artigu ida-ne’e, ha’u sei la ko’alia kle’an ka halo analiza tuir konstitusaun, maibé haree liu ba liberdade espresaun no demokrasia iha era teknolojia indústria 4.0 liga ba proposta esbosu-lei kriminaliza difamasaun hosi Governu.

Liberdade espresaun direitu ne’ebé ema hotu iha nu’udar animal rasionale, ne’ebé bele tetu no haree saida mak di’ak no saida mak aat ho rasionalizmu. Iha teoria direitu ema-nian (HAM, sigla indonézia), liberdade espresaun tama iha direitu umanu sosiál polítika ne’ebé ema ida labele hasai ka hadau. Ema hotu iha direitu atu espresa saida mak sira hanoin no sente ho maneira oin-oin.

Ida-ne’e konsagra ona iha Konstitusaun RDTL, artigu 40, kona-ba liberdade ko’alia no informasaun ninian iha alinea-1 hateten, ema hotu-hotu iha direitu ba liberdade ko’alia ninian no direitu atu hetan informasaun ruma, no tan informasaun loloos nian, no iha alinea-2 hateten klaru liu tan katak, liberdade ko’alia no informasaun ninian labele hetan limitasaun hosi sensura ruma (KRDTL, art. 40). Ida-ne’e atu hatudu, liberdade espresaun sai baze prinsipál ba demokrasia ka kurasaun (fuan) ba demokrasia (Virgilio da Silva Guterres, Grande Entervista (11/06/2020).

Bainhira Governu prodús proposta esbosu-lei kriminaliza difamasaun ne’e hetan reasaun kontra ka krítika maka’as hosi Asosiasaun Jornalista Timor Lorosa’e (AJTL), Prezidente Konsellu Imprensa (CI, sigla portugés), Diretór AJAR, estudante (akademista), no selu-seluk tan ne’ebé hato’o sira-nia krítika hodi reprezenta povu lian laek sira-nia lian.

Ita hotu konkorda ho krítika hirak ne’e ho objetivu atu hametin no haforsa direitu liberdade espresaun ne’ebé ita hotu iha. Liberdade espresaun hanesan dalan di’ak ba ita atu hato’o no soran ita-nia argumentu ba desizaun ka prátika polítika ruma hosi nai-ulun (ukun-nain) sira ho krítika.

Iha krítika hirak ne’ebé ita haree, rona no hatene, katak liberdade espresaun sai baze prinsipál ba demokrasia. Ho razaun ida-ne’e, proposta esbosu-lei kriminaliza difamasaun ne’ebé Governu liuhosi Ministru Justisa prodús, hetan krítika maka’as hosi sosiedade Timor-Leste (povu). Razaun, tanba lei kriminaliza difamasaun refere sei hamenus liberdade espresaun.

Kritiku-nain balun hatutan lei kriminaliza difamasun ne’ebe Governu prodús atu haforsa no hametin sira-nia autoridade nu’udar nai-ulun ne’ebé labele hetan krítika ho sé-sé de’it. Simplesmente, ita bele dehan lei ne’ebé Ministru Justisa prodús sai lutu ba nai-ulun sira atu moris seguru iha “lutu demokrasia” nia laran.

La sente, mundu agora tama ona iha era ne’ebé ema bolu mundu revolusaun indústria 4.0. Mundu ne’ebé mudansa tebes iha teknolojia informasaun ne’ebé serbisu hotu-hotu uza teknolojia moderna. Iha era revolusaun ida hanesan ne’e, teknolojia sai dalan di’ak mós atu halo krítika no evalua aktu polítika hosi Governu ne’ebé povu no nasaun sira seluk bele asesu hodi haree no hatene.

Iha ne’e, ita bele dehan, revolusaun industriál 4.0, fó pasu di’ak atu hamoris demokrasia liuhosi liberdade espresaun. Bele halo krítika no evalua aktu polítika hosi Governu liuhosi mídia sosiál sira. Revolusaun Indústria 4.0 hamosu mós saida mak ema bolu demokrasia dijitál (Very Wahyudi, 2018. Vol. 1. No. 2: 151-152). Liuhosi teknolojia informasaun ema bele espresa saida mak sira hanoin no sente. Simplesmente, teknolojia hamosu liberdade espresaun ho dalan modernu.

Ha’u konkorda ho opiniaun hirak ne’ebé kontra esbosu lei kriminaliza difamasaun ne’ebé Ministru Justisa psodús no fó sai mídia sira. La sala, Governu iha hanoin atu redús ka hapara komentáriu negativu iha mídia sosiál, liuliu iha Facebook ne’ebé trata nai-ulun sira uza identidade falsa. Maibé esbosu lei kriminaliza difamasaun la’ós dalan di’ak atu redús ka hapara krítika (hotar ka tolok) ba nai-ulun sira. Revolusaun Indústria 4.0 fó ona mai ita dalan di’ak atu haree hahalok má-atitude (hotar, tolok no trata) hirak ne’e tuir lalaok teknolojia.

Teknolojia Indústria 4.0 no Demokrasia Dijitál

Teknologi Indústria 4.0 sai liafuan ne’ebé familiár tebes iha tempu post-modernizmu. Ita hotu hatene mudansa teknolojia hosi 1.0 to’o teknolojia 4.0. Teknolojia 4.0, hanesan optimalizasaun komputarizasaun indústria 3.0. Teknolojia indústria 4.0, hamosu mundu foun atu hala’o serbisu hotu-hotu ho teknolojia dijitál no internet.

Tuir Angela Merkel, revolusaun teknolojia indústria 4.0, hanesan tranformasaun konperensivu hosi aspetu produsaun hotu iha indústria liuhosi kolaborasaun teknolojia dijitál no internet. Iha sorin balun, Kagerman, ho nia maluk sira fó definisaun “teknikal” katak indústria teknolojia 4.0, integrasaun hosi Cyber Physical System (CSP) no Internet of Things and Services (ioT and ioS) ba prosesu indústria (Angela Merkel, 2014: 300).

Teknolojia indústria 4.0, fó benefisiu iha era post-modernu ida-ne’e. Teknolojia 4.0 hatuur mai ita, Internet of Things (IoT) ne’ebé ho nia, ita bele asesu informasaun ho rede internet atu nune’e bele transfer data; depois iha Big Data, Argumented Reality, Cyber Security (hodi haforsa seguransa informasaun atu redús Cyberattack ka simplesmente ita bele dehan atu redús ka hapara informasaun sira ne’ebé la justu ho intensaun atu hafoer, hamonu, no nauk informasaun, integridade, no confidentiality), iha mós Artifical Intelegence, addictive Manufacturong, Integrated System, no Cloud Computing (idcloudhost.com).

Se ita haree pontu importante teknolojia 4.0 iha leten, liuliu Cyber Security, ita tenke otimista katak la presiza lei kriminaliza difamasaun atu redús ka hapara aktu krítika (hotar, tolok, ka insulta) lider nasionál sira. Teknolojia 4.0 fó ita dalan atu rezolve problema hirak ne’e, tuir dalan teknolojia sen-kontra liberdade espresaun. Governu la presiza halo proposta lei kriminalija difamasaun maibé prepara ka halo proposta lei atu hametin Cyber security hodi haree aktu má-edukadu liuhosi mídia tuir lei ne’ebé iha.

La sente, teknologia 4.0, loke no halo mundu tomak besik iha ita-nia oin. Ema hotu bele asesu informasaun iha mundu ho fasil no lais, no ema bele espresa sira-nia opiniaun ka sentimentu ho livre. Teknolojia 4.0 fó pájina no espasu foun liberdade espresaun ba ema hotu. Mídia sosiál fó fatin no tempu atu estuda liután saida mak demokrasia. Modelu demokrasia ida-ne’e, ema hanaran demokrasia dijitál, ne’ebé liuhosi mídia dijitál haforsa partisipasuan povu hodi dezenvolve demokrasia. Internet sai mídia komunikasaun atu fahe informasaun no prosesu demokrasia ne’ebé ita iha (Sandi Allifiansyah, 2016: 152).

Teknolojia informasaun no komunikasaun hanesan internet hamosu ruang publik (espasu públiku) foun mai ita ho naran ruang siber (espasu siber). Iha definisaun polítika, espasu públika hanesan reprezentasaun polítika. Habermas, filosofu mazhab Frankfurt, hanaran “fungsi politik ruang publik” (funsaun polítika espasu públika) ne’ebé sai fatin ba politiku nain sira atu hakle’an sira-nia interese polítika (Very Wahyudi, 2018: 156). Iha ne’e, espasu siber (ruang siber) ka espasu públikur (uang publik) hamosu fatin foun atu hetan demokrasia ho prinsípiu partisipasaun, tranparensia, no akuntabilidade.

“Say No To” Liberdade Espresaun=”Say No To” Demokrasia

Ita hotu hatene teknolojia indústria 4.0 fó ema liberdade atu asesu buat hotu no halo krítika ba aktu polítika ka sosiál ekonomia, direitu, no buat seluk tan ne’ebé ita sente la di’ak. Se ita halo reflesaun ba situasaun Timor-Leste agora, liuliu ba polítika atuál, espesialmente ba proposta esbosu-lei kriminalija defamasaun ne’ebé Ministru Justisa prodús, ita bele dehan proposta lei ida-ne’e la tuir ona tempu teknolojia 4.0. Ha’u konkorda ho krítika hirak ne’ebé maluk barak halo.

Proposta esbosu-lei kriminaliza difamasaun la’ós atu eduka ema maibé hamate liberdade espresaun iha tempu mileniu ne’ebé mudansa ho nia teknolojia 4.0. Teknolojia 4.0, loke dalan luan ka kle’an ba demokrasia ne’ebé buras liu la’ós ba ditadura. Liuhosi mídia dijitál no internet, povu ai-leba bele haree, rona, no hatene, saida mak nia nai-ulun sira halo no bele fó krítika ka sujestaun.

Tuir ha’u-nia hanoin, Lei kriminaliza Difamasun, la’ós redús ka hapara krítika má-edukadu uza ID Falsu iha mídia sosiál, liuliu iha facabook maibé fó dalan atu redús ka bele hapara liberdade espresaun. Se atu redús ka hapara krítika má-edukadu ba nai-ulun sira, la presiza hatuur lei kriminalija difamasaun maibé hametin ka haforsa Cyver Security iha mídia. To’o iha ne’e, ita bele dehan lei kriminaliza difamasaun iha espiritu “say no to” liberdade espresaun” hanesan mós “say no to” demokrasia, tanba liberdade espresaun sai baze prinsipál ka kurasaun ba demokrasia.

Timor-Leste nasaun demokrasia ne’ebé harii iha tempu mileniu. Ha’u fiar katak, ita iha kapasidade ne’ebé kle’an atu hametin Cyber Security  iha nasaun ida-ne’e. Atu hametin liután Cyber Security ho dalan juridiku, Governu bele hamosu lei Sybercrime. Hametin Cyber Security no hamosu lei Sybercrime, dalan di’ak atu redús krítika má-edukadu iha mídia sira ne’ebé Timor-Leste enfrenta agora. Teknolojia indústria 4.0, “say yes to” liberdade espresaun (demokrasia) no “yes no to” mentalidade oligarkia no otoritarianizmu.

Ba ha’u, halo regulamentu ka lei ho intensaun atu redús liberdade espresaun ho interese polítika, ita bele dehan ita-nia Governu ladauk iha mentalidade no kapasidade ka seidauk preparadu atu hasoru mudansa teknolojia 4.0. Ita atrazadu (ketinggalan zaman). Iha sikun seluk, ita mós bele dehan ita laiha mentalidade atu kombate polítika ho hanoin demokrasia moderna.

Se proposta esbosu-lei kriminaliza difamasaun justu ho planeamentu juridiku atu redús ka hapara krítika má-edukativu iha mídia sosiál ka ho liafuan hosi deputadu sira atu eduka povu, ita bele dehan tan Governu halo lei lahó hanoin ne’ebé kle’an alias menus kapasidade atu halo lei ho loloos no hatene saida mak demokrasia.

Krítika hirak ne’ebé povu hatuur ba esbosu lei kriminaliza difamasaun, la’ós atu hateten ka halo konkluzaun lais ba proposta esbosu-lei kriminaliza difamasaun. Maibé, ida-ne’e atu hatudu lala’ok demokrasia mak ida-ne’e duni. Ha’u apresia ba Primeiru-Ministru, Taur Matan Ruak, ne’ebe fó tempu ba sosiedade atu diskute esbosu-lei kriminaliza difamasaun. Aktu ida-ne’e hatudu dalan no lalaok demokrasia nian. Ida-ne’e mak espasu públiku ba povu atu diskute ho rasionalizmu ba proposta esbosu-lei kriminaliza difamasaun, liuhosi mídia sosiál no konferénsia imprensa.

Ita-nia KRDTL, artigu 40 kona-ba liberdade ko’alia no informasaun ninian, iha alinea-1 hateten, ema hotu-hotu iha direitu ba liberdade koalia ninian no direitu atu hetan informasaun ruma, no tan informasaun loloos nian no alinea-2 hateten klaru liu tan katak, liberdade ko’alia no informasaun ninian labele hetan limitasaun hosi sensura ruma (KRDTL, art. 40). Ida-ne’e signifika katak, ema hotu iha liberdade atu krítika ba Governu bainhira la’o sees hosi dalan demokrasia. Ikus liu, “say no to” le’i kriminaliza difamasaun no “say yes to” lei Sybercrime hodi redús ka hapara krítika má-edukadu iha mídia sosiál atu liberdade espresaun ne’ebé sai kurasaun ba demokrasia ezisti nafatin tuir nia dalan.

Lian Maktaka

Iha lian maktaka ida-ne’e, ha’u atu soe netik poezia ida ne’ebé ha’u hakerek tinan rua liu ba ho titulu “Hanoin Rona” hodi taka artigu ida-ne’e;

“Knananuk murak mai rani ha’u tilun oan Timor.

Interese povu, unidade nasional, knanuk domin.

Laran haksolok, sente tanis sei la mai.

Sente susar sei la hatenu. Maibe, loron mai fila ba kalan, lian uma fukun hamosu triste.

 

Interese Povu sai knananuk nanal ruin laek.

Laran- fuan interese privadu-partikulár.

Lian uma fukun la tuir malu.

Povu tauk triste, laran tanis hein susar mosu mai moris.

 

Oh, uma fukun lulik.

Ha’u nai parlamentu.

Haloos lian, tau laran sai ida.

Rona no haree ami lian terus halerik.

Rona malu, hanoin hadomi ami”.

Hakerek nain alumni Universidade Gadjah Mada (UGM), Jogjakarta, Indonézia

1 KOMENTÁRIU

HAKEREK NO HATÁN

Please enter your comment!
Please enter your name here