Prezidente Parlamentu Nasionál, Deputadu Aniceto Longuinhos Guterres Lopez, konfirma Arsebispu Arkedioseze Metropolitana Dili, Dom Virgílio do Carmo da Silva. Imajen Tatoli/Evaristo Soares Martins.

DILI, 01 jullu 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopez, konfirma Arsebispu Arkedioseze Metropolitana Dili, Dom Virgílio do Carmo da Silva, SDB, kona-ba reprezentasaun Igreja Katólika nian iha Konsellu Konsultivu Fundu Petrolíferu (KKFP).

Notísia Relevante: Aniceto Guterres Fó Pose Juvinal Dias Nu’udar Prezidente KKFP

Durante ne’e, nia hatutan, reprezentasaun Igreja Katólika mak Pe. Júlio Crispim nu’udar Prezidente KKFP no oras ne’e mandatu ramata ona no transfere ona ba Juvinál Dias maibé Padre Júlio Crispim nafatin membru KKFP.

Prezidente Parlamentu Nasionál, Deputadu Aniceto Longuinhos Guterres Lopez, akompaña husi Vise-Prezidente Parlamentu Nasionál, Deputadu Luis Roberto, Sekretária Meza Parlamentu Nasionál, Deputada Lídia Norberta Martins no Vise-Sekretária Meza Parlamentu Nasionál, Deputada Regina Freitas komprimenta Bispu Dioseze Dili, Dom Virgílio do Carmo da Silva, iha Lecidere, kuarta ne’e.

Prezidente Parlamentu Nasionál, Deputadu Aniceto Guterres ho ninia ekipa, komprimenta Arsebispu Arkedioseze Metropolitana Dili ne’e, hanesan enkontru inisiál ida hosi enkontru regulár ne’ebé Parlamentu Nasionál no Arquidioseze Metropolitana Dili nian tenke iha.

Tanba parlamentu ne’e reprezenta povu Timor-Leste tomak mais 90% Katóliku, nia hateten, entaun komunikasaun ka kontaktu regulár entre parlamentu ho Arkedioseze reprezenta igreja Katólika iha Timor ne’e importante.

“Igreja Katólika parte hosi konfisaun relijioza iha Timor-Leste, iha fatin ida-ne’ebé tenke prenxe tanba durante Padre Júlio Cirspim mak reprezenta igreja iha konsellu ne’e, maibé nia mandatu hotu ona entaun tenke hetan dezignasaun foun. Ha’u haruka tiha ona karta ba Igreja Katólika atu substtitui. Ha’u propoin nafatin Igreja Katólika nian tanba situasaun ida-ne’ebé krusiál tebes,” Aniceto Guterres informa ba jornalista sira, hafaoin hala’o enkontru ho Arsebispu Arkedioseze Metropolitana Dili, Dom Virgílio do Carmo da Silva, SDB, iha Lecidere, Dili, kuarta ne’e.

Entretantu, Arsebispu Arkedioseze Metropolitana Dili, Dom Virgílio do Carmo da Silva, SDB, sei haree asuntu ne’e tanba igreja Katólika seidauk iha kandidatu foun hodi substitui Padre Júlio Crispim.

“Ami simu tiha ona karta ida no ami seidauk bele halo substituisaun. Maibé, ami koko atu haree took legalidade sei bele halo estensaun tempu ba Padre Júlio Crispim iha momentu ruma tán, bainhira ami buka kandidatu foun. Maibé, ami sei haruka karta tuir lei ne’e, bele ka lae halo estensaun ba Padre Júlio Crispim nia mandatu nu’udar membru iha KKFP,” Arsebispu ne’e hateten.

Bazeia ba Lei Fundu Petrolíferu (LPF) númeru 9/2005  kapítulu V, artigu 25.2 nomoos artigu 30.4 mak sai baze legál ba KKFP nia konselleiru sira hodi ezerse sira-nia mandatu.

Durasaun mandatu bazeia ba Lei Fundu Petrolíferu artigu 27.1 deskreve mandatu membru konsellu konsultivu hosi LFP ba tinan-lima, signifika kada membru KKFP hala’o funsaun hanesan konselleiru durante tinan 5 nia laran de’it . Prezidente Parlamentu Nasionál mak sei fó pose fali ba membru foun wainhira membru tuan nia mandatu remata.

Estrutura KKFP 2018 mak hanesan Prezidente mak Konselleiru Pe. Júlio Crispim Ximenes Belo agora transfere ona ba konselleiru Juvinal Dias, Sekretária mak Konselleira Zélia Fernandes. Membru KKFP kompostu husi Konselleiru José Augusto Fernandes Teixera, konselleira Júlio Fernandes no konselleira Izilda Pereira Santos.

Kompozisaun membru KKFP segundu no terseiru mandatu tinan 2018 nian kompostu hosi Konselleiru José Augusto Fernandes Teixeira no Konselleira Izilda Manuela da Luz Pereira nu’udar reprezentante Parlamentu Nasionál, Konselleiru Juvinal Diaz no Konselleira Zélia Fernandes nu’udar reprezentante Sosiedade Sivíl, Konselleiru Júlio Fernandes reprezenta Emprezáriu Nasionál no Konselleiru Pe. Júlio Crispim Ximenes Belo reprezenta Konfisaun Relijioza.

Notísia Relevante: Prezidente Parlamentu Nasionál Husu Eis-Titulár Partisipa Atividade KKFP

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here