Ministru Korodenadór Asuntu Ekonómiku, Joaquim Amaral, Imajen/MKAE

DILI, 01 jullu 2020 (TATOLI)Ministru Korodenadór Asuntu Ekonómiku, Joaquim Amaral simu orientasaun husi Primeiru-Ministru (PM), Taur Matan Ruak, atu aselera prosesu ambiente negósiu, nune’e bele halo rekoperasaun ekonómika iha Timor-Leste hafoin situasaun surtu COVID-19 no implementasaun Estadu Emerjénsia.

“Ita-nia situasaun agora hafoin COVID-19 liu ona maibé ekonomia seidauk liu no kontinua sai todan. Tanba ne’e maka orientasaun Primeiru-Ministru atu haree no aselera prosesu ambiente negósiu sira, no mós fó atensaun ba setór produtivu atubele hadi’a oportunidade iha servisu, inklui oportunidade atu rezilénsia karik sei iha COVID-19 faze daruak,” tenik Ministru Joaquim Amaral hafoin ramata audiénsia ho PM Taur iha Palásiu Governu, kuarta ne’e.

Governante ne’e dehan, nia parte sei esforsu hodi konkretiza planu ekonómiku sira ne’ebé seidauk realiza.

“Konserteza ekipa ne’ebé servisu iha tempu badak ho tinan-rua tenke haree programa ne’ebé  bele iha vizibilidade,” nia akresenta.

Maski ho dezafíu boot, maibé ministru ne’e promete sei rezolve setór ekonomia iha Timor-Leste.

“Mandatu Ministru Koordenadór Asuntu Ekonómiku iha dezafíu tebes tanba ita-nia misaun maka atu halo ekonomia ne’e buras. Iha konteksu ekonomia ne’e Governu presiza promove kondisaun iha negósiu,” hateten Ministru Joaquim Amaral.

Nia konsidera, amibente negósiu presiza hadi’a barak liu, setór produtivu tenke iha atividade, setór agrikultura, setór servisu, turizmu, no setór seluk ne’ebé liga ba ekonomia iha rai-laran.

Tuir nia, atu diversifika no dezevolve setór ekonomia rai-laran nu’udar Ministru Koordenadór Asuntu Ekonómiku iha papél atu kontinua tau matan ba setór produtivu sira hodi book-an no kontinua halo aprosimasaun no servisu hamutuk ho setór privadu atu aselera no konkretiza objetivu sira.

“Atu dezenvolve ekonomia maka tenke tau atensaun ba setór produtivu primáriu,  sekundáriu no tersiáriu. Sira-ne’e hotu tenke la’o no Governu nia papél maka promove kondisaun hanesan halo diálogu permanente ho setór privadu sira atu nune’e ida-idak bele halo ita-nia ekonomia sai buras,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here