Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (01/07). Imajen Tatoli/Egas Cristovão

DILI, 01 jullu 2020 (TATOLI) – Governu liuhosi reuniaun Konsellu Ministru (KM) aprova projetu Dekretu-Lei ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães, kona-ba alterasaun ba Rejimentu Konsellu Ministru nian.

“Revizaun ba rejimentu ne’e ho objektivu hodi re-organiza kompéntensia ministru sira no Membru Governu nian, ne’ebé reflete ba alterasaun orgánika VIII Governu Konstituisionál nian,” dehan Ministru Fidelis hafoin ramata reuniaun ezekutivu iha Palásiu Governu, kuarta oin.

Alterasaun ne’e sei halo revizaun ba regra hirak kona-ba prosedimemtu legizlativu Governu nian hodi konsidera no integra mós kompétensia husi reforma legizlativa nian iha Prezidénsia Konsellu Ministru (PKM).

Governante ne’e esplika, rejimentu atuál buka atu mantein desizaun importante atu lejisla no orienta loloos prosedimentu lejizlativu sira, liuliu iha ámbitu atu fundamenta desizaun inklui planu lejizlativu Governu nian ne’ebé halo bebeik avaliasaun.

Tuir Ministru ne’e, alterasaun ne’e sei mantein mós versaun atuál hanesan disipliña rejimentu hirak ne’ebé uluk hatur ona, liuliu haree atu simplifika prosedimentu lejizlativa hodi evita la hamosu duplikasaun ba intervensaun husi interesadu sira.

“Iha momentu ne’ebé tenke halo emisaun ba paresér obrigatóriu no la tuir suirkulasaun diploma molok marka ajenda iha Konsellu Ministru no reforma mekanizmu artikulasaun kontributu ba prosedimentu lejizlativu,” nia esklarese.

Iha biban hanesan, ezekutivu sira aprova projetu Dekretu-Lei ne’ebé aprezenta husi Ministru Fidelis, kona-ba orgánika PKM nian.

Diploma ne’e atu haree ba estrutura governamentál foun inklui estabelese kompeténsia hirak ne’ebé PKM iha hodi konsidera mós natureza jurídika espesífika nu’udar departamentu governamentál, ne’ebé prezide hosi Primeiru-Ministru no koadjuva husi PKM.

Objetivu husi lejizlasuan ne’e atu reforsa efisiénsia ba asaun administrativa husi servisu administrativu hodi organiza servisu sentrál hirak ne’ebé hamahon-an iha diresaun Diretór Jerál Administrasaun nian.

Esperiénsia iha ona bainhira Ministériu Reforma Lejislativa ba Asuntu Parlamentár halo reforma ba prosedimentu lejizlativu no ba inovasaun administrativa ne’ebé sei reflete iha reorganizasaun administrativa PKM nian, liuhosi kria Gabinete Apoiu Jurídiku no Gabinete ba Reforma Administrativa hodi halo preparasaun no implementasaun atu Ministru ezerse duni nia kompeténsia sira ne’ebé prevee ona iha artigu 13.º orgánika VIII Governu Konstitusionál nian.

Ideia ne’e fó mós autonomia ba Gabinete servisu apoiu ezersísiu ministeriál no funsaun porta-voz Governu nian inklui reforsu ba servisu tradusaun ba Governu tomak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here