Primeiru-Ministru, Taur Matan Ruak halo transférensia koordenasaun Sala Situasaun ba Ministériu Saúde, ne’ebé reprezenta husi Ministra Saúde foun, Odete Maria Freitas Belo. Imajen Tatoli/Egas Cristovão

DILI, 30 juñu 2020 (TATOLI) – Primeiru-Ministru (PM), Taur Matan Ruak hamutuk ho Segundu Komandante Operasionál Sentru Integradu Jestaun Krize (CIGC, sigla portugés), Brigadeiru Jenerál João Miranda ‘Aluc Descartes’, ofisialmente halo transferénsia koordenasaun Sala Situasaun CIGC ba Ministériu Saúde (MS).

Atividade transferénsia ne’e realiza tanba Governu laiha ona Estadu Emerjénsia, tanba ne’e automatikamente Sala Situasaun mós laiha ona.

“Ohin loron importante tebes tanba loron ida marka rohan no tranzisaun responsabilidade ne’ebé Sala Situasaun asume iha fulan-tolu nia-laran filafali ba Ministériu Saúde. Sala Situasaun funsiona iha momentu deklarasaun Estadu Emerjénsia,” hateten PM Taur iha ámbitu transferénsia koordenasaun Sala Situasaun ba MS iha Sentru Konvensaun Dili (CCD, sigla portugés), tersa ne’e.

Tanba CIGC nia luta kontra COVID-19 ho susesu maka Xefe Governu ne’e hato’o felisitasaun no agradese ba ekipa tomak.

“Ha’u fó saudasoens espesiál no parabéns ba ekipa Sala Situasaun nian ne’ebé halo servisu di’ak loos. Ha’u lori ha’u nia naran rasik, Governu no Estadu nia naran, sauda sira ne’ebé servisu iha Sala Situasaun hahú husi pesoál limpeza, kondutór sira ne’ebé tau matan ba lójistika, no profisionál saúde. Ha’u orgullozu loos ba sira-nia servisu ho rezultadu di’ak loos tanba ita halakon moras ne’ebé ba ema na’in-25 no evita moras ne’e da’et ba komunidade, liuliu laiha ema maka mate,” Taur akresenta.

Maski nune’e, Xefe Governu rekoñese katak konkista ne’e la’ós Sala Situasaun nian de’it maibé timor-oan nian tomak, parseiru internasionál sira, Embaixada sira, no Ajénsia Organizasaun Nasaun Unida (ONU) nian.

“Maibé atu dehan katak ita-nia luta seidauk hotu, dalan atu ita prepara-an di’ak liu maka kumpre regra sira ne’ebé Ministériu Saúde no Organizasaun Nasaun Unida (OMS) fó ona,” nia tenik.

PM Taur mós dezeja kontinuasaun servisu di’ak ba MS ne’ebé simu ona responsabilidade ida ne’e no ba ajénsia sira ne’ebé tutela ba MS hodi prepara-an nafatin.

Iha ámbitu transferénsia koordenasaun Sala Situasaun ba MS ne’e entrega mós sertifikadu apresiasaun ba ekipa liña oin sira, kompostu hosi profísionál saúde sira, membru FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) destakadu iha Sala Situasaun, Ekipa Cruz Vermella, no mídia sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here