Tribunál Distritál Dili. Imajen/Tribunais.tl

DILI, 30 juñu 2020 (TATOLI) – Tribunál Distritál Dili (TDD), liuhosi Juiza Albertina Neves, ohin, deside adia julgamentu ba kazu arma branka no ofensa simples ne’ebé komete hodi arguidu ho inisiál EA ne’ebé lori katana taa kanek lezadu CA iha Ermera iha tinan 2019.

Tuir loloos audiénsia julgamentu ne’e  atu  rona deklarasaun arguidu nian, maibé la marka prezensa tanba ho razaun laiha transporte atu lori arguidu ne’ebé daudaun ne’e kumpre hela iha prizaun preventiva iha Prizaun Gleno.

Juiza Albertina Neves, deklara Tribunál deside hodi adia julgamentu ba iha loron 03 jullu 2020, tuku 10:00  Otl, hodi ne’ebé sei realiza liu hosi julgamentu tribunal movel.

Tuir aktu hosi Ministéiru Públiku katak iha loron 9 marsu 2019, tuku 16:00 Otl, iha Aldeia Riatoni, Suku Haupo, Letefoho Ermera, lezadu ho inisiál CA ba iha merkadu hein ema ida atu selu nia osan, maibé hein to’o lokraik, ema ne’e la mosu, tanba ne’e mak lezadu mós fila-fali de’it ba nia uma.

To’o iha uma lezadu deskansa kuaze oras 01, maibé lezadu nia maun maka liuhosi ne’ebá hodi hasé lezadu dehan, “Hadeer ona, loron labele toba demais liu” no kontinua lao liu ba nia uma, hafoin lezadu mós hadeer sai ba tur iha ninia odamatan veranda.

La kleur, arguidu ho inisiál EA hosi nia uma ka’er katana rua iha liman sorin-sorin, fizga-ida  iha bolsu no ai-dona-ida (1) kesi ho tali tara iha kotuk to’o ba husu kedas lezadu dehan ‘o maka hateten ha’u ka”, husu tiha nune’e ba lezadu, imediatamente ho katana ida iha liman karuk hikis ba iha lezadu ninia rentos dala-tolu (3x) halo kulit tara no ran kedas.

Arguidu kontinua hodi katana ida iha liman loos ne’e atu taa lezadu, maibé la konsege tanba lezadu halai tiha ba iha testemuña HD nia uma hodi husu ajuda nune’e telefone kedas ba iha Ofisiál Polísia Suku (OPS) halo atuasaun.

Kauza husi taa ne’e, lezadu hetan kanek too suku pontu tolu (3) iha rentos katak, hosi arguidu ninia aktu ne’e la halo lezadu ninia kanek todan, maibé halo de’it kulit maka nakloke (kanek no ran).

Jornalista   : Nelson de Sousa

Editór        : Francisco Simões

 

 

HAKEREK NO HATÁN

Please enter your comment!
Please enter your name here