Primeiru-Ministru, Taur Matan Ruak. Imajen Tatoli/Egas Cristovão

DILI, 30 juñu 2020 (TATOLI) – Daudaun ne’e Governu Timor-Leste seidauk deside reativa voo komersiál internasionál maibé iha situasaun balun ne’ebé presiza rekursu umanu ajuda hala’o servisu iha Timor-Leste, sei iha movimentasaun ema tama territóriu nasionál maibé nafatin kumpre medida prevensaun sira ne’ebé estabelese ona husi Organizasaun Mundiál Saúde (OMS) no Ministériu Saúde (MS), liuliu ba kuarentena.

Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Nune’e mós, iha área fronteira terrestre hahú 2 juñu sei iha limitasaun ba movimentasaun ema no sasán, ne’ebé loke de’it kada semana dala-ida iha kada kuarta, iha oras rua nia laran.

Primeiru-Ministru (PM), Taur Matan Ruak, hateten Timor-Leste bele ona loke aeroportu tanba laiha ona kazu ativu COVID-19, maibé nasaun seluk seidauk loke aeroportu no surtu ne’e sei nafatin iha nasaun seluk, tanba ne’e maski ema tama iha situasaun emerjénsia mai Timor-Leste hanesan traballadór husi organizasaun mundiál sira, nafatin kumpre kuarentena obrigatóriu.

“Iha Estadu Emerjénsia datoluk Governu autoriza ema tama hanesan funsionáriu Organizasaun Nasaun Unida (ONU), Embaixada sira, emprezáriu sira ne’ebé servisu iha ita-nia rain ne’ebé tau-matan ba projetu sira, maibé signifika katak ba oin ita sei husik tama maibé regra saúde tenke tuir no sira sei aprezenta sira-nia atestadu médiku,’ hateten PM Taur iha ámbitu transferénsia koordenasaun Sala situasaun ba MS iha Sentru Konvensaun Dili (CCD, sigla portugés), tersa ne’e.

Profisionál saúde sira sei halo teste no sidadaun sira ne’ebé husi rai-li’ur kontinua tama kuarentena obrigatóriu no auto-kuarentena durante loron-14.

Xefe Governu argumenta, Timór mak livre ona hosi moras ne’e maibé nasaun viziñu sira hanesan Indonézia no Austrália kontinua rejista moras COVID-19, tanba ne’e sira seidauk bele loke sira-nia fronteira no aeroportu.

“Moras ne’e iha Timór rasik laiha ona maibé iha nasaun viziñu sira sei iha. Bainhira sei iha entaun medida sira ne’ebé atu hola maka presiza kontrola ema ne’ebé tama mai, naturalmente sira tenke tuir nafatin regra sira ne’ebé Ministériu Saúde estabelese ona tanba prátika normál ita halo ona iha aeroportu, portu, fronteira sira. Medida sira n’e nafatin implementa, aeroportu ita de’it mak loke maibé ita-nia viziñu sira seidauk,” nia akresenta.

PM Taur haktuir, foin daudaun hakarak haruka moras ida ba Singapura maibé nasaun seluk la autoriza, hanesan Indonézia ba fatin tránzitu, autorizasaun maibé iha kazu esesionál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here