Eis Ministru Interiór Filomeno da Paixão de Jesus, entrega relatóriu servisu ba Primeiru-Ministru no Ministru Interiór, Taur Matan Ruak. Imajen/Eugénio Pereira

DILI, 30 juñu 2020 (TATOLI)- Ministru Defeza, Filomeno da Paixão de Jesus, dehan Governu adia polítika atu halo rekrutamentu ba kandidatu membru FALINTIL-Forsa Defeza Timor-Leste (F-FDTL) foun na’in-600 sei hala’o fila-fali iha tinan 2021.

Ministru Filomeno Paixão dehan, razaun Governu adia prosesu rekrutamentu ne’e ba tinan 2021, tanba ba tinan 2020 orsamentu rekrutamentu seidauk iha.

Nia hatutan, tuir loloos rekrutamentu ba kandidatu membru F-FDTL na’in-600 ne’e hala’o ona iha tinan 2020, maibé tanba situasaun polítika rai-laran no Orsamentu Jerál Estadu (OJE) 2020 nian  sumba tiha iha Parlamentu Nasionál.

 “Agora ita muda fila fali prosesu rekrutamentu membru F-FDTL sira ne’e ba 2021, tanba orsamentu foin lalais 2020 ne’e sumba tiha iha PN,” hateten Ministru Filomeno Paixão, ba jornalista, ohin, iha Ministériu Interiór, Vila-Verde, Dili.

Lori naran Governu Timor-Leste no Komandu F-FDTL, Brigadeiru Jenerál Filomeno  Paixão apela ba joven feto-mane iha territóriu Timor-Leste ne’ebé hatama ona vaga ba Komisáriu Rekrutamentu Konjunta atu kontinua mantein pás, kuidadu sira-nia saúde hodi treinu maka’as para bele kompete iha prosesu rekrutamentu.

Nia hatutan, rekrutamentu membru F-FDTL foun ne’e atu aumenta rekursu forsa F-FDTL nian hodi substitui membru F-FDTL sira ne’ebé idade tama ona ba reforma.

Ministru hatutan, tuir lista membru F-FDTL no PNTL sira ne’ebé idade liu ona tinan-60 tenke reforma, tanba ne’e, Ministériu Defeza no Komandu F-FDTL no PNTL aprezenta ona Estatutu Instituisaun forsa rua nian ba Konsellu Ministru diskute hodi bele aprova iha tempu besik.

Jornalista   : Eugénio Pereira

Editór        : Francisco Simões  

HAKEREK NO HATÁN

Please enter your comment!
Please enter your name here