Imajen/Mídia PR.

DILI, 30 juñu 2020 (TATOLI)–Prezidente Repúblika liuhosi Kaza Sivíl Prezidénsia Repúblika Demokrátika Timor-Leste ho  Plan International Timor-Leste (PITL), asina Memorandu Entendimentu kona-ba ‘Impaktu Negativu hosi Kaben Sedu no Isin Rua Sedu, Hapara Violénsia hasoru Labarik, Labarik Feto no Feto iha Timor-Leste’ liuiu kona-ba igualidade jéneru.

Iha serimónia asinatura ne’e, Kaza Sivil-Prezidénsia Repúblika Demokrátika Timor-Leste reprezenta hosi Xefe Kaza Sivil, Francisco Maria de Vasconcelos no Plan International Timor-Leste (PITL) reprezenta hosi Country Director.

Komunikadu ne’ebé fó sai hosi mídia Prezidénsia Repúblika hateten, iha Memorandu Entendimentu ida-ne’e, Espoza Prezidente Repúblika, Cidália Lopes Nobre Mouzinho Guterres, sei sai nu’udár Embaxadora ba Kampaña ‘Impaktu Negativu hosi Kaben Sedu no Isin Rua Sedu no mós Hapara Violénsia hasoru Labarik, Labarik Feto no Feto iha Timor-Leste’.

Objetivu prinsipál husi Memorandu Entendimentu mak atu kontribui ba promove igualidade jéneru liuhosi empodera labarik feto no feto enjerál, hodi realiza sira-nia direitu iha área hotu-hotu.

Objetivu seluk tan mak hapara violénsia no diskriminasaun hotu hasoru labarik (mane no feto), liuliu labarik feto no feto enjerál iha Timor-Leste no servisu influensiasaun ne’e sei realiza. Tanba, iha evidénsia forte hosi PITL ho nia parseiru sira ne’ebé halo servisu iha baze no bazeadu ba relatóriu peskiza no avaliasaun hotu ne’ebé PITL, komunidade no parseiru sosiedade sivil iha Aileu no Ainaro halo ona.

Liu ida ne’e, PITL iha komitmentu boot ba partisipasaun feto no labarik feto iha área hotu partikularmente igualidade jéneru.

Atu fasilita diskusaun nakloke entre feto no labarik feto sira ba tópiku igualidade jéneru no asuntu seluk, Plan International inisia programa ida ho naran Girls Out Loud inisia iha Columbia iha 2017.

Objetivu prinsipál mak atu kria espasu seguru ida ba labarik feto sira hodi diskute asuntu saida de’it mak sira senti no hanoin. Mekanizmu ne’ebé uza mak diskusaun refere hala’o iha Grupu Facebook ho naran Girls Out Loud Timor-Leste.

Girls Out Loud Timor-Leste hahú ihaloron 12 de Juñu 2020 ho membru agora daudaun ne’e 274 membru iha Facebook group ba Labarik Feto no Feto idade 15–26.

Atividade prinsipál Girls Out Loud Timor-Leste fahe ba parte haat mak hanesan kria tópiku ne’ebé interese ba labarik feto sira hanesan igualidade jéneru, prevensaun COVID-19 inklui mós asuntu violénsia bazeia ba jéneru.

Liu ida ne’e, Girls Out Loud Timor-Leste fasilita diskusaun liuhosi interasaun komentáriu no reasaun Facebook nian, diskusaun iha Messenger no Meet Up ka enkontru hamutuk ho membru Girls Out Loud Timor-Leste.

Tamba ne’e, Girls Out Loud Timor-Leste iha komitmentu hasa’e koñesimentu feto no labarik feto sira ba asuntu igualidade jéneru hodi kontribui ba sosiedade armonia no dame.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here