Prezidente Repúblika, Francisco Guterres Lú Olo. Imajen António Gonçalves

DILI, 30 juñu 2020 (TATOLI)—Prezidente-Repúblika (PR), Francisco Guterres ‘Lú Olo’, promulga ona transferénsia estraordinária ho montante millaun $286.3 hosi fundu petrolíferu.

Komunikadu imprensa ne’ebé Agência TATOLI asesu, ohin, haktuir Prezidente Repúblika, Francisco Guterres Lú Olo, promulga Lei númeru 17/V kona-ba autorizasaun ba realizasaun transferénsia estraordinária hosi Fundu Petrolíferu ho valór millaun $286.3.

“Osan ho valór  millaun $286.3 ne’e sei utiliza hodi garante  kondisaun finanseira ba funsionamentu Administrasaun Públika to’o aprovasaun Orsamentu Jerál Estadu ba tinan 2020,” dehan  Prezidente Repúblika, Francisco Guterres Lú Olo liuhosi komunikadu imprensa ne’ebé Agência TATOLI asesu hosi Palásiu Prezidensiál Nicolau Lobato, Bairru Pite, Dili, tersa ne’e. 

Xefe estadu ne’e hatutan, transferénsia estraordinária daruak hala’o tanba osan ho valór millaun $250 ne’ebé autoriza hosi Lei númeru 2/20, 6 abril, la sufisiente atu finánsia despeza esensiál no garante ezersísiu funsaun soberanu Estadu, kumprimentu ninian obrigasaun legál no kontratuál no prestasaun serbisu mínimu ba protesaun sosiál.

Lei ne’e, tuir nia, nu’udar alterasaun dahuluk hosi Lei númeru 2/2020, 6 abril, ne’ebé autoriza realizasaun transferénsia estraordinária husi Fundu Petrolíferu iha tinan finanseiru 2020 hodi kria Fundu COVID-19.

Finalidade ba transferénsia estraordinária daruak mak atu finánsia Fundu COVID-19 ho montante millaun $69.5 no ba Konta Jerál Tezouru ho montante masimu millaun $ 216.8.

Prezidente Repúblika promulga montante orsamentu ne’e hafoin Parlamentu Nasionál aprova autorizasaun pedidu hosi Governu nian.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here