Prezidente Parlamentu Nasional, Aniceto Longuinhos Guterres Lopez. Imajen/Antonio Goncalves.

DILI, 30 juñu 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopez hateten, ohin, Plenária Parlamentu Nasionál halo diskusaun no aprovasaun iha faze Jeneralidade ba proposta lei númeru 16/V (2) kona-ba Lei Protesaun Sivíl hodi haruka fila-fali ba Komisaun B atu kontinua diskute iha faze espesialidade.

Rezultadu votasaun ba proposta lei númeru 16/V (2) kona-ba Lei Protesaun Sivíl iha faze jeneralidade ne’e a-favór 49 kontra 0 no abstensaun 1. Lei protesaun sivíl ne’e restrinje ema-nia direitu ho objetivu atu proteje ema-nia vida, bens no patrimoniál kuandu akontese kalamidade públika.

“Nune’e, plenária delibera hodi haruka fila-fali proposta Lei Protesaun Sivíl ba Komisaun B atu trata iha faze espesialidade, ho mandatu mak ne’e depois ida-ne’e lori fila-fali mai plenária atu hetan aprovasaun iha finál globál. Rezultadu votasaun ne’e haruka fila-fali ba Komisaun B atu deskuti no aprova iha espesialidade depois mak lori fila-fali mai iha plenária atu hetan aprovasaun final glogál,” dehan Prezidente Parlamentu Nasionál, Deputadu Aniceto Guterres, liuhosi plenária, tersa ne’e. 

Aniceto hateten, plenáriu haruka fila proposta lei ba Komisaun B (Negósiu Estranjeiru, Defeza no Seguransa), nune’e bele halo diskusaun ho ministériu relevante hafoin aprezenta ba plenária iha Parlamentu Nasionál.

Tanba ne’e, nia husu ba Prezidente Komisaun B atu halo kalendáriu hodi kontinua diskute lei refere iha faze espesialidade.

“Hakarak fó hanoin katak ita-nia sesaun lejizlativa to’o de’it 14 jullu. Se konsege halo hotu antes 14 jullu iha aprovasaun espesialidade entaun di’ak. Maibé, se la konsege mós Komisaun B halo koordenasaun ho Komisaun permanente bele kontinua serbisu durante tempu resesu bele konvoka reuniaun estraordinária,” PPN fó hanoin.

Entretantu, Deputada Carmelita Caetano Moniz hosi Bankada CNRT hateten lei protesaun sivíl ne’e restrinje ema-nia direitu ho objetivu atu proteje ema-nia vida, bens no patrimonial kuandu akontese kalamidade públika.

“Lei ida-ne’e Baixa ba Komisaun kompetente (Komisaun B) ba aprovasaun iha espesialidade. Ita-boot sira tenke halo armonizasaun ho Lei Defeza Nasionál, Lei Seguransa Nasionál tanba artigu ida iha ne’ebá ko’alia kona-ba kalamidade públika. Oinsá, ita-boot sira haree ida-ne’e ho didi’ak,” Deputada Carmelita fó hanoin.

Iha biban hanesan, Sekretáriu Estadu Protesaun Sivíl, Joaquim Gusmão, hateten molok elabora lei ne’e konsulta ona ho Sosiedade Sivíl sira, konifisaun relijioza sira no mós hamosu diskusaun entre liña ministeriál hafoin elabora lei ne’e ho didi’ak.

“Hakarak esplika, antes prepara lei ne’e iha etapa barak mak ekipa jurídiku sira hala’o inklui ita halo estudu komparativu iha Austrália, Portugál, Indonézia, Amérika no mós Singapura. Ita mós halo serimónia internasionál ida hodi bele elabora lei ne’e no konvida peritu internasionál sira. Lei ne’e ita elabora ho kondisaun reál iha ita-nia rain. Ita foti balun sai hanesan referénsia maibé lei ne’e ita elabora tuir ita-nia kondisaun real iha ita-nia rain, tanba ita iha  de’it tempu rua mak bailoron no tempu udan. Ne’e mak ita halo ajustamentu,” nia dehan. 

Jornalista : Evaristo Soares Martins  

Editór       :  Cancio Ximenes

 

HAKEREK NO HATÁN

Please enter your comment!
Please enter your name here