Ministru Turismu, Komérsiu no Indústria, José Lucas do Carmo da Silva, akompaña ho Vise-Ministru Turismu, Komérsiu no Indústria, Domingos Lopes Antunes hala’o vizita ba CCD. Imajen Tatoli/Florêncio Miranda Ximenes

DILI, 30 juñu 2020 (TATOLI) – Ministériu Turizmu, Komérsiu no Indústria (MTKI) sei mellora infraestutura no estatutu Sentru Konvesaun Dili (CCD, sigla portugés) atubele hatama reseita bainhira ema aluga.

Ministru Turizmu, Komérsiu no Indústria, José Lucas do Carmo da Silva, akompaña ho Vise- Ministru Turizmu, Komérsiu no Indústria, Domingos Lopes Antunes, hala’o vizita ba CCD hodi haree jestaun administasaun no kondisaun infraestutura.

“Ba ita importante maka atu halo mak melloramentu jestaun no estatutu, liuliu infraestutura hodi hakbiit no reforsa buka reseita,” tenik Ministru José Lucas ba Agência Tatoli iha CCD, tersa ne’e.

Ho nune’e, Goverante ne’e husu ba jerente ne’ebé tau-matan ba edifísiu ne’e atu kontinua servisu ho di’ak.

Iha sorin seluk, Administradór CCD, Agostu Manuel Carvalho, dehan maski CCD  durante ne’e hatama reseita maka’as maibé ninia fasilidade no infraesututra hahú a’at.

“Durante tinan 10 ona mak infraestutura CCD ne’e laiha manutensaun no komesa a’at daudaun, tanba ne’e iha Orsamentu Jerál Estadu (OJE) 2020 ami propoin atu halo reabilitasaun maibé infelizmente orsamentu xumba iha Parlamentu Nasionál,” nia haktuir.

Jerente ne’e iha esperansa bele iha orsamentu ona atubele hadi’a fali kondisaun infraestutura ho di’ak.

Kona-ba reseita ne’ebé durante ne’e kobre, Administadór CCD ne’e informa hahú agostu to’o dezembru 2019 konsege kobre reseita hamutuk $45.000 no janeiru to’o marsu 2019 rekola reseita hamutuk $18.000.

“Sala kompletu ema aluga kada loron ho kustu $3.000, maibé ida ne’e la konta ho fasilidade iha li’ur. Kuandu ba oin ami nia estatutu iha ona maka kualkér fatin ne’ebé iha ami tenke fó tarifa,” nia subliña.

Hafoin tama situasaun COVID-19, ekipa Sala Situasaun Sentru Integradu Jestaun Krize (CIGC, sigla portugés) maka uza CCD.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here