Ministra Saúde foun, Odete Maria Freitas Belo. Imajen /Egas Cristovão

DILI, 30 juñu 2020 (TATOLI)-Ministra Saúde, Odete Maria Freitas Belo, husu nafatin kontribuisaun husi Instituisaun hotu-hotu atu prevene no halo metigasaun ba surtu coronavirus maski Timor-Leste rasik livre ona husi pandemia globál ne’e.

Governante hato’o kestaun ne’e hafoin Primeiru-Ministru, Taur Matan Ruak, ofisialmente enssera ona servisu Sala Situasaun, Sentru Integradu Jestaun Krize (CIGC-sigla portugés) tanba Governu deside la estende tan Estadu Emerjénsia hodi entrega hikas koordenasaun servisu ne’e ba Ministériu Saúde.

Notísia Relevante :PM Taur Enserra Sala Situasaun Maibé Gabinete Jestaun Krize Kontinua Funsiona

”Agora daudaun ita laiha kazu, la signifika ita livre husi COVID-19 entaun ita prepara banhira ema tama  no sai aviaun tun mai ita lahatene ema lori saida mai ita-nia ra’in tanba mundu seidauk livre husi COVID-19”, dehan Governante ba jornalista sira iha Sentru Konvensaun Dili (CCD, sigla portugé).

Ministériu Saúde sei halo preparasaun másimu, nune’e bele prevene no halo mitigasaun ba kazu COVID-19 bainhira mosu filafali kazu foun iha Timor-Leste.

Governante apresia maski sala situasaun la funsiona, maibé Gabinete Jestaun Krize ne’ebé tutela iha Gabinete Primeiru-Ministru kontinua eziste hodi fó tulun ba Ministériu Saúde atu halo prevensaun ba kazu pandemia globál ne’e.

”Ha’u hanoin baze legál sira ne’e ita iha no prontu hein hela Gabinete Jestaun Krize ne’ebé tutela mós iha Primeiru-Ministru nian ne’ebé nafatin eziste no hala’o servisu no ajuda ami, tanba ami mós iha servisu manuál seluk ne’ebé mak iha”, tenik, Odete.

Maibé Odete hateten Ministériu Saúde presiza baze legál hodi asume kna’ar ne’e, nune’e bele fó kompeténsia atu halo prevensaun no mitigasaun ba coronavirus.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here