Paizajen iha área Cristo Rei. Imajen/Espesiál

DILI, 30 juñu 2020 (TATOLI) – Iha planu Orsamentu Jerál Estadu (OJE) 2020 no 2021 fó ona prioridade ba dezenvolvimentu setór turizmu hodi hatama mós reseita ba kofre Estadu, nune’e la dependénsia maka’as liu ba fundu petrolíferu.

Ministru Turizmu, Komérsiu no Indústria, José Lucas do Carmo da Silva, konsidera Timor-Leste iha rekursu no potensialidade ba área turizmu ne’ebé presiza foku dezenvolve ho di’ak hodi sai alternativa.

“Ita iha rekursu, entaun presiza hahú hanoin atu kria kondisaun sustentável ba oin nune’e setór turizmu sai hanesan alternativa hatama reseita ba Estadu iha ita-nia rai-laran,” tenik Ministru José Lucas ba Agência Tatoli iha Sentru Konvesaun Dili (CCD, sigla portugés), tersa ne’e

Notísia Relevante: Governu Aprova Kriasaun Komisaun Interministeriál Dezenvolvimentu Turizmu

Tuir Governante ne’e, daudaun ne’e OJE 2020 no 2021 ba Ministériu Turizmu, Komérsiu no Industria (MTKI) seidauk detallu maibé iha ona diskusaun ba preperasaun programa prioridade sira atubele ezekuta.

Governante ne’e dehan, instituisaun sira daudaun ne’e halo ezersísiu atu fó importánsia no tau osan ba setór produtivu sira inklui sei halo diskusaun maka’as ho setór privadu sira atu partisipa maka’as liu iha prosesu dezenvolvimentu turizmu, komérsiu no industria nian.

“Ha’u sei foku liu ba programa ne’ebé iha ona hanesan dezenvolve setór turizmu kulturál, istóriku no espirituál hodi fó benefísiu ba komunidade sira no tempu hanesan sira bele sente sai na’in ba programa sira ne’e,” nia afirma.

Antes ne’e, Diretór Jerál MTKI, José Filipe Dias Quintas, informa ministériu ne’e prepara ona planu mestre hodi fó prioridade ba sítiu turíztiku sira ne’ebé sai ikóniku munisípiu sira iha 2020.

Planu prioridade ba sítiu turíztiku sira ne’ebé sai ikóniku munisípiu sira ne’e bazeia ba Planu Estratéjiku Dezenvolvimentu Nasionál (PEDN) 2011 to’o 2030.

Iha parte Leste sei fó prioridade ba Parke Nasionál Nino Konis Santana, liuliu Illa Jaco, parte Sentrál foka Cristo Rei no Oeste foku ba bee-manas Marobo no Foho Ramelau.

Planu mestre ne’e, MTKI sei prevee osan millaun U$1,5 hanesan planu integradu ida hodi haree ba impaktu ambientál, sosiál no ekonómiku hodi dezenvolve no hadi’a infraestrutura sítiu turíztiku sira ne’e.

Iha tinan-2020, MTKI sei fó prioridade dahuluk ba sítiu turíztiku ikóniku sira no tuir fali ba dezenvolve fatin turizmu istóriku, relijiozu, kultura no seluk tan.

Ba inisiativa ne’e, VIII Governu Konstitusionál liuhosi desizaun Konsellu Ministru estabelese ona komisaun interministeriál atu dezenvolvimentu setór turizmu iha Timor-Leste.

Parte importante atu liña ministeriál kontribui dezenvolve setór turizmu maka iha parte infrastrutura bázika, konetividade, presu aviaun no vistu atubele dada turizta sira mai vizita Timór Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here