Ministru Turizmu , Komérsiu no Indústria, José Lucas do Carmo da Silva, akompaña ho Vise MTCI, Domingos Lopes Antunes halo enkontru ho funsionáriu CCD. Imajen Tatoli/Florêncio Miranda Ximenes

DILI, 30 juñu 2020 (TATOLI) – Hafoin hala’o vizita traballu ba funsionáriu sira iha Sentru Konvesaun Dili (CCD, sigla portugés), Ministru Turizmu, Komérsiu no Indústria, José Lucas do Carmo da Silva, enkoraja funsonáriu iha kada diresaun hotu iha Ministériu Turizmu Komérsiu no Industria (MTKI) nia okos atu hamutuk hodi serví povu no nasaun.

Ministru José Lucas akompaña ho Vise-Ministru Turizmu, Komérsiu no Indústria, Domingos Lopes Antunes hala’o vizita traballu ba CCD.

“Ami lideransa foun ne’ebé foin asume kargu, hahú vizita diresaun sira iha MTKI nia okos iha semana hirak liubá hodi haree besik funsionáriu sira no koñese malu, nune’e bele konsolida forsa hamutuk hodi serví povu no nasaun ne’e,” tenik governante ne’e ba Agência Tatoli iha CCD, tersa ne’e.

Tuir nia, atu servisu hamutuk presiza koñese malu entre funsionáriu ho ninia lideransa sira tanba la’ós lideransa sira maka servisu mesak, maibé funsionáriu hotu iha papél importante hodi lori susesu instituisaun.

“Ha’u enkorja nafatin maluk sira ne’ebé servisu iha diresaun hotu atu mantein sira nia didikasaun no kompromisu durante sira hala’o kna’ar atu sai servidór di’ak ba povu no nasaun,” nia enkoraja.

Ministru José Lucas dehan, dinámika iha lideransa ne’e normál maibé lideransa ida-nia papél mak hakbesik-an ba funsionáriu sira iha diresaun hotu hodi motiva no hafanu sira atu servisu hamutuk.

Iha 24 juñu, Prezidente Repúblika fó pose ba restante membru VIII Governu Konstitusionál, inklui Ministru Turizmu, Komérsiu no Indústria, José Lucas do Carmo da Silva no Vise Ministru Turizmu, Komérsiu no Indústria, Domingos Lopes Antunes, liuhosi Dekretu Prezidente Repúblika,  númeru 53/2020 no uza kompeténsia Konstitusionál tuir artigu 106 númeru 2.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here