Ministru Asuntu Parlamentár no Komunikasaun Sosiál, Francisco Jerónimo bainhira dada-lia ho estrutura CI iha ninia gabinete MAPKOMS, Palásiu Governu, tersa (30/06). Imajen/CI

DILI, 30 juñu 2020 (TATOLI) Ministru Asuntu Parlamentár no Komunikasaun Sosiál, Francisco Jerónimo, apresia servisu Conselho de Imprensa (CI) durante tinan-haat nia-laran ne’ebé lideradu husi Virgílio Guterres ho nia konselleru nain-haat.

Ministru nota katak, saida maka durante ne’e parte CI halo di’ak tebes ein termu promove liberdade espresaun no imprensa, promove independénsia ba meiu komunikasun sosiál sira, asegura asesu jornalista iha atividade jornalístika no promove no asegura kualidade produtu jornalístiku, tanba ne’e ba oin Ministériu Asuntu Parlamentár no Komunikasaun Sosiál (MAPKOMS) komprometidu sei fó apoiu ba órgaun independente ne’e.

“Ein prinsípiu saida maka sira halo ona di’ak tebes, tanba durante ne’e sira halo intervensaun ba buat ruma ne’ebé maka jornalista halo no mós buat ruma kontra kódigu étika sira hanesan konsege bolu mídia na’in sira bainhira komete infrasaun iha atividade jornalístika,” dehan Francisco Jerónimo hafoin enkotru ho estrutura CI iha ninia gabinete MAPKOMS, Palásiu Governu, tersa ne’e.

Nune’e, governante ne’e promete sei fó apoiu nafatin ba CI atu hala’o programa ne’ebé tau ona iha planu.

“Ha’u hanoin saida maka durante ne’e Governu fó ba CI, ami sei kontinua nafatin maibé depende ba progresu ne’ebé maka sira iha bainhira aumenta tan programa ne’ebé iha ka programa foun ruma, ami hanesan Governu iha obrigasaun atu fó apoiu,” nia akresenta.

Iha fatin hanesan, Prezidente CI, Virgílio Guterres, ida-ne’e hanesan vizita kortezia ne’ebé CI halo tanba haree ba MAPKOMS nu’udar ministériu foun ne’ebé toma konta iha área komunikasaun sosiál.

Iha biban ne’e, CI relata kona-ba servisu ne’ebé hala’o durante tinan-haat nia laran no asuntu seluk kona-ba mandatu estrutura ne’ebé sei ramata iha tinan ne’e.

“Informa mós ami na’in-lima nian mandatu hotu ona no entre ami, Konsileiru Francisco Simões maka re-eleitu ona husi jornalista sira liuhosi Timor-Leste Press Union (TLPU) maibé ami na’in-haat hein nomeasaun husi Parlamentu, mídia na’in sira nojornalista sira husi asosiasaun seluk,” Virgílio haktuir.

Nia promete, karik mandatu hotu maka la re-eleitu ba kargu Prezidente CI, maka nia parte prontu atu kolabora nafatin ho estrutura foun.

“Ami prontu atu koopera nafatin, pesoalmente ba MAPKOMS no instuisaun sira ne’ebé maka presiza ami-nian kontribuisaun”, tenik Virgilio.

Estrutura atuál CI hahú mandatu iha 2016 to’o 2020 no estrutura ne’e kompostu husi Prezidente CI, Virgílio Guterres no konselleiru na’in-haat hanesan José Maria Ximenes, Hugo Maria Fernandes, Paulo Adriano da Cruz Araújo no Francisco Belo Simões da Costa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here