Motor lubun ne’ebé Polísia Unidade Tránzitu halo apreensaun tanba viola lei tránzitu to’o agora na’in la ba reklama no barak ferrujen hotu ona. Imajen/Eugénio Pereira

DILI, 30 juñu 2020 (TATOLI)-Durante fulan Maiu to’o Juñu, tinan ne’e, akontese asidente tráfegu iha kapitál Dili hamutuk 97 hodi rezulta ema na’in-tolu mate, na’in-12 kanek todan no na’in-86 kanek kaman.

Notísia Relevante : Asidente Tráfegu iha Colmera Rezulta Cesaria da Costa Kelen-Tohar

Komandante Polísia Unidade Tránzitu Munisípiu Dili, Inspetór Domingos Sarmento Gama. Imajen/Eugénio Pereira

Komandante Polísia Unidade Tránzitu Munisípiu Dili, Inspetór Domingos Sarmento Gama, hateten frekuénsia asidente hirak ne’e akontese tanba falta kontrolu hosi umanu ida-idak, inklui la kumpre regra sinais tránzitu, lori transporte ho velosidade, inklui konsumu alkóliku.

“Ami rejista asidente hamutuk 97 ne’ebé rezulta ema na’in-tolu mate, na’in-12 kanek todan no na’in-86 mak kanek kaman,” informa Inspetór Domingos Sarmento Gama, ohin, ba jornalista iha Komandu Polísia Munisípiu Dili.

Nia dehan, PNTL kontinua halo nafatin sosializasaun prevensaun ba públiku atu kondús transporte tenke kontrola-aan hodi evita asidente.

Kobre Reseita $7,911,00

Iha parte seluk, Inspetór Domingos Sarmento Gama, informa, durante  loron 1 too 26 juñu 2020, ekipa PNTL  kobre  mós reseita hamutuk $7,911,00 hodi kontribui ba kofre Estadu Timor-Leste.

Reseita ne’e kobre hosi  transporte sira ne’ebé kontra lei tránzitu no sinais tránzitu iha kapitál Dili.

Transporte hirak ne’ebé viola regra hodi selu koima infrasaun ba Estadu kompostu husi motór Estadu nian ho matrikula G hamutuk  25, motór privadu 13, karreta privadu 243, karreta públiku 15 ho totál evidénsia hamutuk 258.

Daudaun ne’e membru polísia tránzitu Dili ho totál ema na’in-90-liu  kontinua halo operasaun iha kapitál Dili hodi sosializa regra sinais tránzitu atu motorista sira kumpre regra no para transporte iha fatin estasionamentu sira ne’ebé Governu estabelese ona.

Presiza Transporte Tula Karreta

Komandante Tránzitu Dili, Ispetór Domingos husu ba Governu Timor-Leste no Komandu PNTL atu sosa transporte (karreta gandeng) hodi fasilita polísia uza atu tula transporte sira bainhira mosu asidente tráfegu iha kapitál Dili.

Durante ne’e PNTL Dili la iha transporte atu tula karreta no motór sira ne’ebé hasoru asidente tráfegu.  Tanba polísia tenke buka husu ajuda karreta hosi ofisina balun maka ajuda PNTL hodi tula transporte sira ne’e.

Proposta atu sosa karreta ne’e rasik Komandu Polísia Tránzitu Dili aprezenta ona ba Komandu Dili hodi hato’o ba Komandu Jerál PNTL, maibé too agora seidauk  hetan konsiderasaun.

Problema seluk tan ne’ebé Seksaun Unidade Tránzitu Dili enfrenta maka kondisaun fatin investigasaun la seguru no  la iha armáriu atu tau sasán evidénsia no fatin arkivu sira inklui menus fasilidade komputadór, meza no kadeira.

Polísia Tránzitu Dili mós preokupa durante ne’e halo ona pedidu ba Ministériu Públiku atu tau konsiderasaun ba sasán evidénsia apreensaun hanesan motór no karreta  barak, dezde 2002 too 2020  ne’ebé rai hela eskuadra Caicoli too balun sai ferrujen no aat ona, maibé too agora Ministériu Públiku seidauk hasai desizaun atu halo leilaun ba públiku.

Tuir lei kódigu estrada hatete katak, sasán evidénsia kuaze 500 liu ne’ebé halo apreensaun liu loron 90 kuandu na’in ba transporte hirak ne’e la reklama tuir lei sasán sai na’in ba Diresaun Nasionál Patrimóniu Estadu atu halo leilaun ba públiku.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here