Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão

DILI, 30 juñu 2020 (TATOLI)—Ministru Asuntu Parlamentár no Komunikasaun Sosiál, Francisco Jerónimo, hateten Governu sei halo avaliasaun ba figura foun molok nomeia ba lidera Munisípiu Manufahi.

Ministru Asuntu Parlamentár no Komunikasaun Sosiál ko’alia asuntu ne’e hafoin Vise-Xefe Bankada CNRT, Deputadu Patrocínio Fernandes dos Reis, husu progresu rekrutamentu ne’ebé la’o dezde 2019.

“Atu hatete de’it ba deputadu sira katak bainhira rezolusaun hosi Konsellu Ministru deside maibé iha rejeisaun tomak hosi parte Manufahi ninian, liuliu veteranu sira no konsellu konsultativu Manufahi nian. Tanba ne’e maka Governu foti desizaun katak sei iha rejeisaun iha ne’ebá entaun ita haruka administradór ne’e ba para atu halo serbisu ka ba para atu hasoru problema. Tanba ne’e mak Governu dehan haree fila-fali lai hodi halo avaliasaun,” dehan Francisco Jerónimo liuhusi plenária iha  Parlamentu Nasionál, tersa ne’e. 

Iha plenária horisehik, Bankada Congresso Nacional da Recosntrução de Timorense (CNRT) husu Governu esplika progresu loke vaga ba Administradór Munisípiu Manufahi nian tanba to’o agora prosesu rekrutamentu ne’e paradu.

Iha biban ne’e, Vise-Xefe Bankada CNRT, Deputadu Patrocínio Fernandes dos Reis, hateten iha 2019 Konsellu-Ministru aprova rezolusaun ida loke vaga hodi loke rekrutamentu ba administradór munisípiu Manufahi.

“Prosesu liu ona selesaun méritu mak Komisaun Funsaun Públika rasik maka hala’o ida-ne’e no ninia prosesu ne’e to’o tiha ona finál. Até loron 19 fulan-fevereiru 2020, Konsellu Ministru aprova tiha rezolusaun ida hodi halo nomeasaun ba kandidatu ne’ebé konsege sai vensedór iha prosesu rekrutamentu por méritu ne’e maibé to’o agora ita la hatene andamentu ba rezolusaun Konsellu-Ministru ninian to’o iha ne’ebé,” Deputadu CNRT ne’e levanta liuhosi plenária, horisehik.

Nia hatutan, ikus ne’e rona informasaun katak sei iha anulasaun ba rezolusaun Konsellu-Ministru ninian ne’e tanba deteta kandidatu ida Konsellu-Ministru nomeia tiha ne’e la hola-parte iha partidu sira-ne’ebé agora kaer hela Governu ne’e.

Se atetude ida-ne’e mak akontese duni, nia dehan, entaun governasaun ida agora ne’e halo de’it persegisaun polítika ba kuadru partidu CNRT hahú hosi nasionál ba to’o baze. 

Vise-Xefe Bankada CNRT ne’e dehan, se rezoluzaun Konsellu Ministru la vale di’ak liu halakon tiha Komisaun Funsaun Públika (KFP).

Antes ne’e, Administrasaun Munisípiu Manufahi, Carlito Pinheiro, monu no rezulta lakon vida iha loron 30 setembru 2018 no oras ne’e substitui hosi Administradór Interinu Arantes Isaac Sarmento.

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here