Aviaun Airnorth tula ai-moruk no ekipamentu ne'ebé nesesáriu hodi prevene no kombate COVID-19. Imajen Tatoli/Florêncio Miranda Ximenes

DILI, 30 juñu 2020 (TATOLI) – Ministru Transporte Komunikasaun, José Agostinho da Silva, informa Governu Timor-Leste halo ona estensaun kontratu Airnorth to’o 30 jullu, ne’ebé halo operasaun bá-mai husi Darwin-Dili hodi halo atendimentu ba kestaun emerjénsia no transporta ekipamentu iha situasaun COVID-19.

“Agora ita asegura tan fulan-ida. Iha segunda liubá liña ministeriál ba COVID-19 ninia deside atu halo tan estensaun ba kontratu Airnorth atu asegura nafatin ita-nia konektividade Timor-Leste ho Austrália,” dehan Ministru José Agostinho ba Agência Tatoli iha Palásiu Governu, foin lalais ne’e.

Notísia Relevante: Governu Asina Akordu ho Airnorth Asegura Konetividade Aéreu Iha Situasaun Emerjénsia

Governante ne’e haktuir, durante períodu emerjénsia iha fulan-tolu konektividade aérea asegura de’it ba ligasaun Dili-Darwin, ho objetivu atu halo atendimentu ba nesesidade emerjénsia liuliu iha situasaun COVID-19.

“Ita tenke antisipa nafatin karik ba futuru surtu ne’e mosu maibé iha esperansa bele evita moras ne’e. Ligasaun konektividade transporte aéreu Timor-Leste no Austrália importante tanba ne’e maka komisaun interministeriál estende kontratu ho Airnorth ne’e to’o 30 jullu. Ida-ne’e maka desizaun,” nia akresenta.

Kontratu ho Airnorth antes ne’e ba fulan tolu de’it, ne’ebé iha kontratu ne’e sei ramata iha juñu.

“Parte Ministériu Transporte Komunikasaun sei loke komunikasaun ho Airnorth karik posível ita bele redúz  frekuénsia voo. Tanba foin  daudaun iha kontratu ne’e kada semana Airnorth halo operasaun dala tolu, maibé agora liga ba  nesesidade ita menus ona tanba ne’e ha’u orienta ona tékniku sira atu halo koordenasaun ho parte kompañia Airnorth rasik atubele redúz frekuénsia voo,” nia hatutan.

Kustu operasaun Airnorth bá-mai dala ida husi Darwin-Dili hamutuk $15.000 tuir kontratu anterior.

“Klaru kustu voo ne’e nafatin $15.000, agora presiza haree ba ninia frekuénsia voo ne’e mantein dala-tolu kada semana ka hatun dala-rua ka dala-ida,” José Agostinho subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here