Primeiru-Ministru, Taur Matan Ruak. Imajen/Egas Cristovão

DILI, 30 juñu 2020 (TATOLI) – VIII Governu Konstitusionál ne’ebé Xefia husi Primeiru-Ministru (PM), Taur Matan Ruak agradese ba parseiru dezenvolvimentu sira nia apoiu iha ámbitu prevensaun no mitigasaun surtu COVID-19 iha Timor-Leste.

“Ha’u hakarak agradese ba ita-nia parseiru dezenvolvimentu sira hanesan Organizasaun Nasaun Unidas (ONU), Embaixada hotu iha ita-nia rain ne’ebé durante ne’e fó apoia inklui ajénsia internasionál ONU nian hanesan Organizasaun Mundiál Saúde (OMS) no sira seluk hodi kombate moras ne’e iha ita-nia rai,” hateten PM Taur iha ámbitu transferénsia koordenasaun Sala Situasaun ba Ministériu Saúde (MS) iha Sentru Konvensaun Dili (CCD, sigla portugés), tersa ne’e.

Xefe Governu rekoñese, atu kombate surtu COVID-19 la’ós papél ema ida nian de’it maibé koletivu.

“Tanba ne’e ha’u lori nasaun tómak nia naran, tantu Governu, Prezidénsia Repúblika, Parlamentu Nasionál agradese ba sira hotu no ita kontinua presiza sira-nia apoiu, kontribuisaun iha jornada ida-ne’e ba oin,” nia akresenta.

Biban ne’e, Taur mós agradese ba sidadaun sira tanba luta kontra COVID-19 sura mós ho apoia sidadaun sira nian.

“Sidadaun sira halo esforsu no matenek hodi kumpre regra, maski defísil tebes maibé barak mak kumpre regra hanesan uza máskara, fase liman bebeik, no halo distansiamentu sosiál,” dehan Xefe Governu.

PM nafatin fó hanoin ba sidadaun sira katak COVID-19 iha Timor-Leste mak laiha ona, maibé moras ne’e sei eziste nafatin iha mundu, tanba ne’e presiza nafatin kumpre regulamentu OMS no MS nian atu nune’e kontinualivre hosi moras ne’e.

Iha loron 15 maiu, Sentru Integradu Kestaun Krize (CIGC, sigla portugés) deklara katak pasiente konfirmadu no provável rekuperadu hotu ona, maibé to’o oras ne’e ekipa saúde nafatin halo vijilánsia sentinela.

Totál kazu konfirmadu ne’ebé rejista iha Timor-Leste hamutuk na’in-24 no provável na’in-haat, ne’ebé husi totál konfirmadu ne’e, na’in-22 rejista iha Dili enkuantu na’in-rua seluk rejista iha Munisípiu Liquiçá.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here