Profisionál Saúde sira tuir formasaun. Imajen Tatoli/Felicidade Ximenes

DILI, 30 juñu 2020 (TATOLI) – Reprezentante Ekipa profisionál Saúde liña frente, Doutor Flávio Brandão hato’o sentimentu orgullu ba ekipa pesoál saúde hanesan doutór, enfrermeira no parteira sira inklui ekipa apoiu hotu ne’ebé ho dedikasaun tomak luta kontra COVID-19 iha Timor-Leste.

“Orgullu katak hanesan sidadaun ne’ebé  hola parte iha luta kontra surtu COVID-19 hamutuk ho pesoál saúde iha liña frente ba ita-nia preparasaun hodi salva ita-nia família no nasaun husi pandemia globál ne’e,” tenik Doutór Flávio Brandão iha diskursu tranferénsia Sala Situasaun, Sentru Integradu Jesatun Krize (CIGC, sigla portugés) ba Ministériu Saúde (MS) iha Sentru Konvesaun Dili (CCD, sigla portugés), tersa ne’e.

Nia dehan, hanesan koodernadór ba pesoál saúde liña frente ne’ebé luta kontra COVID-19 no simu orientasaun husi Sala Situasaun haree katak servisu hotu hatudu rezultadu estraordináriu tebes tanba laiha kazu ativu ona.

“Ami orgullu tanba iha situasuan ida difísil maibé médiku, infermeiru no parteira hatudu nafatin voluntária ne’ebé hakarak hakbiit-an hanesan FALINTIL hodi luta hasoru COVID-19, maski hatene katak sei iha risku,” nia akresenta.

Tuir nia, Timor-Leste uza tempu ho másimu hodi aprende esperiénsia husi Xina, Koreia Súl, Italia, Estadu Unidu Amérika no Brazíl hodi implementa luta hasoru pandemia globál ne’e.

“Ita uza tempu ho másimu, tanba konsege prepara ita-nia an ho di’ak tebes atu hasoru moras ida-ne’e ho limitasaun ne’ebé ita iha,” nia subliña.

Nia observa, maski durante ne’e surtu lahetan nia lalatak maibé bele hasoru fali bainhira fraku halo preperasaun hamutuk.

“Investimentu ne’ebé mak la’o durante ne’e ba ita-nia alin sira iha liña frente ha’u labele sura, maibé sira-nia didikasaun ha’u hakruuk tebes tanba hotu-hotu iha riksu maibé fó didikasaun ho enérjiku tebes hodi luta kontra COVID-19,” Doutór ne’e agradese.

Nia espera katak ho vontade voluntarizmu ne’ebé sidadaun sira, liuliu ekipa liña frente iha, hanesan osan mean atubele kontinua hamutuk.

“Ita-nia pozitivu ba COVID-19 mak laiha ona maibé pandemia ne’e sei eziste no kontinua afeta ba nasaun seluk, tanba ne’e ita tenke prepara-an mós ba senáriu ida mais piór,” nia sujere.

Flávio Brandão nota, durante ne’e Governu hatudu ona kompromisu atu tau matan voluntáriu sira, ne’ebé hanesan faktór determinate ba susesu luta kontra surtu no saida de’it mak sei mosu iha Timor-Leste.

Nune’e, profisionál saúde ne’e mós orgullu ho  Governu ne’ebé hatudu kompromisu hodi investe iha área saúde hodi luta kontra COVID-19 ne’ebé hatudu rezultadu estraordináriu.

Timor-Leste hahú rejista kazu positvu COVID-19 dahuluk ema na’in-ida iha loron 21 marsu 2020 no kazu ikus liu rejista iha loron 14 abríl.

Totál kazu konfrimadu hamutuk na’in-24 no provável na’in-haat, ne’ebé husi totál konfirmadu ne’e na’in-22 rejista iha Dili enkuantu na’in-rua seluk rejista iha Munsípiu Liquiçá.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here