Tribunal Distritál Dili.

DILI, 30 juñu 2020 (TATOLI) -Tribunál Distritál Díli (TDD), ohin, halo julgamentu ba kazu krime fraude fiskál, kontra bandu no importasaun ilísita ba sasán merkadoria ne’ebé deskonfia envolve hosi arguidu  ho inisiál LSH nu’udar sidadaun estranjeiru  ne’ebé kaer pasaporte Xina.

Audiénsia julgamentu ne’ebé prezide hosi juiz koletivu João Ribeiro, Julmira da Silva no Argentino Nunes ne’e, Ministériu Públiku liuhosi Prokuradór Rogério Viegas Vicente, aprezenta faktu katak iha 03 abríl 2019, purvolta tuku 11:40 Otl, Xefe intelijente hosi Munisípiu Dili nian kontaktu ba iha komandante PNTL Eskuadra Dom Aleixo hodi informa dehan, arguidu LSH ne’ebé hela iha Hotel Fortuna, iha área Hudi-Laran rai sasán merkadoria ilegál  hanesan sigarru stiker no tua-manas Xina nian iha karreta Hilux metan ida nia laran no kalan mak arguidu lori sasán sira-ne’e ba iha fatin karaoke atu fa’an.

Simu tiha informasaun ne’e, membru Polísia Patrulla hosi Eskuadra Dom Aleixo ba kedas iha fatin refere, hodi identifika katak loos duni iha karreta kór metan ida ho marka Hilux ho Xapa matríkula 20.219 TL tula sigarru stiker no tua Xina nian iha karreta refere.

Momentu ne’e kedas komandante PNTL Eskuadra Dom Aleixo telefone ba xefe seksaun investigasaun kriminál Eskuadra Dom Aleixo nian no Diretór Alfándega nian, atu marka prezensa iha fatin refere hodi halo prosedimentu kriminál ba sasán merkadoria ilegal sira ne’ebé arguidu tula iha karreta laran.

Sasán merkadoria ne’ebé mak membru polísia investigasaun no funsionáriu sira alfándega halo apreensaun hamutuk ho arguidu mak hanesan, tua manas marka xina nian hamutuk kaixa-43 no botir-hitu (7), Sigarru Marlboro stiker slop-20, sigarru sampoerna stiker slop-23, sigarru L.A stiker slop-sia  (9), sigarru surya 12 stiker slop-ida, sigarru Surya 16 stiker slop-ida (1) no sigarru Likun slop-1, Ai-Kameli medida sentímetru  40 hamutuk-rua (2), ai-kameli nia uut karón nanotak-ida (1), Ai-kameli modelu musan ákua ki’ik-ida, ai-kameli prodús ona sai kelu hamutuk-26 no tersu-ida (1).

Hafoin halo tiha verifikasaun ba sasán merkadoria hotu, polísia hamutuk ho ekipa operasaun konjunta Alfándega husu mós arguidu atu hatudu dokumentu ruma relasiona ho sasán merkadoria sira ne’e, maibé arguidu la justifika.

Iha primeiru interrogatóriu, arguidu rasik konfesa katak, loos duni nia mak tula sigarru stiker no tua manas hirak ne’e ba iha karreta refere durante fulan ida ona atu ba soe, maibé tempu mak laiha no lahatene fatin lixu iha Tibar atu ba soe, tanba antes nia parte mós simu ona notifikasaun hosi funsionáriu komérsiu no indústria katak sasán ne’e liu ona prazu tenke halo rahun ka ba soe iha tiha.

Iha tinan 2018, funsionáriu sira hosi komérsiu no AIFAESA ba iha arguidu ninia loza hodi halo inspesaun, maibé la hetan sasán hirak ne’e tanba arguidu muda tiha ona sasán sira-ne’e.

Arguidu mós deklara katak, tua manas Xina nian hamutuk kaixa 43 no botir-7 ne’e nia folin hamutuk $3000.00, sigarru sira hotu nia folin $500.00 no Ai-kameli nia folin $60.00.

Arguidu hatene katak, iha Timor-Leste laiha fábrika sigarru stiker no mós laiha fábrika tua manas Xina nian, ne’ebé arguidu ba sosa sasán sira-ne’e ilegál, tanba sasán sira ne’e kontra bandu no la autoriza hodi halo negósiu iha Timor-Leste.

Arguidu LSH mós hatene katak Estadu Timor-Leste iha lei no regra própriu ne’ebé maka regula kona-ba importasaun sigarru no tua-manas tenke selu taxa ba Estadu maibé nia parte ignora tiha hodi la kumpre lei no sosa fa’an sasán merkadoria ne’ebé kontra bandu.

Arguidu mós hatene katak, uainhira atu importa no sosa sasán merkadoria mai Timor-Leste tenke hetan lisensa hosi autoridade relevante, maibé arguidu la kumpre ninia obrigasaun hodi viola artigu 366 no 367 hosi kódigu Aduaneira, lei númeru 14/2017.

Arguidu LSH prátika ho livre intensionalmente no konsiente hela katak hahalok hanesan ne’e labele, tanba kontra dekretu lei númeru 14/2017 hosi kódigu Aduaneira no mós arguidu hatene katak ninia hahalok krime no punidu tuir lei penál.

Ministériu Públiku promove arguidu ho krime tolu mak hanesan krime fraude fiskál previstu iha artigu 314 nú.1, kontrabandu (315 nú.1) no importasaun ilísita ba sasán merkadoria nú.1. Kódigu Penál Timor Leste.

Sasin ho inisiál JJX nu’udar Diretór Nasionál Operasaun Alfándega hateten, altura ne’ebá nia hetan kontaktu hosi segundu komandante PNTL Dom Aleixo katak sira iha ona fatin krime nian iha Hudi-Laran, no halo ona identifikasaun ba arguidu no halo mós apreensaun ba sasán hirak ne’e.

Nia dehan, liu de’it minutu balun nia parte ho ekipa to’o iha fatin hodi halo atuasaun, no identifika sigarru, ai-kameli no tua manas iha karreta kotuk.

Tuir lei ne’ebé iha katak, antes atu importa tabaku tenke haruka uluk pedidu ba Ministériu Saúde hodi autoriza, prazu loron 30. Maibé, momentu ne’ebá arguidu rasik la hatudu nia dokumentu sira kona-ba importasaun sasán merkadoria ba polísia nune’e bele apár ho dokumentu balun ne’ebé parte Alfándega iha.

Sasin hosi servisu Alfándega ne’e dehan tan, kona ba tua bazeia ba lei númeru 08/2008 kona-ba lei tributária nian ne’e bele importa, maibé ba sigarru bele importa maibé tenke prienxe rekizitu formal hosi Ministériu Saúde bazeia ba dekretu lei númeru 16/2017.

Hafoin Tribunál rona tiha deklarasaun hosi parte sira deside adia hikas julgamentu ne’e ba iha loron 21 jullu, tinan ne’e, tuku 11:00 otl, hodi rona sasin seluk.

Iha audiénsia julgamentu ne’e, arguidu hetan asisténsia legál hosi Defensór Públiku José Camões.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here