Vise Primeiru-Ministru no Ministru Planu no Ordenamentu, José Maria dos Reis. Imajen/Espesiál

DILI, 29 juñu 2020 (TATOLI) – Vise Primeiru-Ministru no Ministru no Ministru ba Planu no Ordenamentu Territóriu, José Maria dos Reis, hasoru malu ho Primeiru-Ministru, Taur Matan Ruak, hodi simu orientasaun kona-ba servisu ordenamentu territóriu.

“Primeiru-Ministru fó instrusaun lubun ida maibé ministériu ne’e foun no transforma husi Ministériu Planu Investimentu no Estratéjika (MPIE), konserteza fulan ida-ne’e nia laran ha’u sei konsolida ministériu sira ho planu ne’ebé mak iha atu halo kontaktu ho ajénsia sira iha ministériu nia okos, hanesan Ajénsia Dezenvolvimentu Nasionál (ADN) no Sekretariadu Grande Projetu (SGP),” relata José dos Reis hafoin hasoru Xefe Governu iha Palásiu Governu, segunda ne’e.

Tuir governante ne’e, durante ne’e nia parte seidauk hala’o enkontru intensivu ho instituisaun relevante sira atu bele ko’alia kona-ba ordenamentu territóriu, tanba ne’e nia halo enkontru ho PM Taur atu hatene loloos pontu situasaun atu bele halo planu di’ak liután.

Antes ne’e, Ministériu Obra Públika (MOP) inisia ona Dekretu-Lei tolu ne’ebé relasiona ho Planu Urbanu hanesan Lei Jestaun Territoriál, Klasifikasaun Uzu Solu no Urbanizasaun inklui Edifikasaun Urbanu no fahe ona ba kada ministériu hodi analiza tanba lejizlasaun ne’e envolve servisu liña ministériu.

Bainhira lei tolu ne’e aprova, parte kompetente bele halo planeamentu urbanu no mós regulamentu hodi kontrola ema hela dook iha estrada inklui bele organiza sidade.

Nune’e mós, regula kreximentu ambiente fíziku ne’ebé sidadaun sira instala iha sidade. Halo jestaun movimentu transporte no tráfiku, ne’ebé tuir servisu liña ministériu kabe ba kapasidade Ministériu Transporte no Komunikasaun (MTK), ho vizaun presiza melloramentu rede estrada no ponte atu fasilita movimentu.

Rezultadu progresu servisu MOP iha tinan-2019 iha área Abitasaun no Planeamentu Urbanu maka hanesan programa atu harii uma ho unidade 4.000 iha sidade Dili, estudu pre-viabilidade no identifikasaun sítiu kompletu ona no tama faze negosiasaun ho parseiru internasionál hanesan International Finance Corporation (IFC) no parséiru dezenvolvimentu sira atu dezenvolve estudu no dezeñu ho modalidade PPP (Parseiru Públiku Privadu).

Ministériu ne’e mós estabelese ona akordu ho parseiru dezenvolvimento hanesan Organizasaun Nasaun Unida (ONU) ba asuntu abitasaun hodi apoiu harii planeamentu territoriál ba Dili no prosedimentu kontrolu dezenvolvimentu fíziku no lansa ona konkursu ba estudu revitalizasaun Aitarak-Laran no polu dezenvolvimentu ba Batugade no munisípiu seluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here