Porkuradór Jerál Repúblika, José Ximenes. Imajen: Tatoli

DILI, 29 juñu 2020 (TATOLI)–Prokuradór Jerál Repúblika (PJR), José da Costa Ximenes, informa ba Prezidente Repúblika (PR), Francisco Guterres Lú Olo, kona-ba publikasaun livru ne’ebé ko’alia kona-ba ezisténsia tinan 20 Ministériu Públiku (MP), oras ne’e atinje ona 92%. 

José Ximenes informa asuntu ne’e hafoin hala’o enkontru regulár ho Prezidente Repúblika, Francisco Guterres Lú Olo, iha palásiu Prezidensiál Nicolau Lobato, Bairru Pité, Dili.

“Informa ba Prezidente Repúblika katak, tuir loloos, ministériu públiku selebra ezisténsia ba dala-20 no konstrusaun maibé tanba kestaun surtu COVID-19, nune’e ami la konsege organiza eventu ida-ne’e. Ami adia tiha ba inísiu tinan judisiál nian iha fulan Setembru. Iha komemorasaun ida-ne’e, Ministériu Públiiku iha Prokuradoria Jerál Repúblika ita prepara livru ida hodi dedika ba instituisaun ne’ebé maka ami serbí besik tinan 20. Ohin, ami oferese livru ne’e ne’ebé ninia finanlizasaun kuaze 92% ona,” dehan José da Costa Ximenes ba jornalista sira.

Nia informa, livru ne’e ho títulu “Ministériu Públiku no Protesaun ba Família no Minór iha Timor” hanesan modelu integradu hosi intervensaun Ministériu Públiku ninian.  

“Tanba, ami husu ba Prezidente Repúblika atu bele halo (hakerek) hela prefásiu badak ida ba iha livru ida-ne’e,” nia hateten. 

Entretantu Lei Parlamentu nian númeru 14/2005 ne’ebé ko’alia kona-ba Estatutu Ministériu Públiku hateten, Majistratura Ministériu Públiku konstitui pilár importante ida esensiál tebes iha ne’ebé asenta administrasaun justisa, kabe ba ezerse asaun penal, nune’e mós tenke konstitui hodi garante  legalidade demokrátika no promotora ba kumprimentu lei.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here