Sesaun Plenária Iha Parlamentu Nasionál. Imajen /Egas Cristovão

DILI, 29 juñu 2020 (TATOLI)—Reprezentante Povu iha Uma Fukun Parlamentu Nasionál preokupa ho remunerasaun ba Ajente Administrasaun (AA) iha Ministériu Saúde ne’ebé tuur iha eskritóriu de’it maibé remunerasaun boot liu fali médiku sira-ne’ebé kategoriza liña frente iha ámbitu kombate surtu COVID-19. 

Notísia Relevante: Profisionál Saúde Sira Bele Simu Ona Osan Suplementu Remuneratóriu

Deputadu Bankada FRETILIN, Dário Madeira, husu Governu buka meiu oinsá bele fó solusaun ba ekipa liña frente sira ne’ebé durante ne’e serbisu iha ámbitu hasoru surtu COVID-19.

”Karik bele tenke loke investigasaun ruma no Komisaun Inkéritu Parlamentár (KIP) tenke halo fiskalizasaun ida-ne’ebé tenke lalais tanba mosu diskriminasaun hasoru médiku sira-ne’ebé maka envolve iha liña frente sira. Ha’u foti asuntu ida-ne’e tanba kuaze iha pagamentu ne’ebé mak halo ona ba sira iha liña frente ne’e sira-nia direitu. Osan ne’ebé fó ne’e la responde ba sira-nia serbisu ne’ebé mak sira halo durante fulan-rua nia laran maibé ba sira-ne’ebé ajente administrasaun hanesan xefe departamentu no diretór sira-ne’e boot liu fali sira liña frente sira. Afinál, sira tuur iha kantor no sira ne’e la tún ba terrenu,” Deputadu Dário Madeira informa liuhosi plenária, Parlamentu Nasionál, segunda ne’e.

Tuir nia, liña frente sira-nia subsídiu durante fulan-rua balun hetan de’it dolar $500 no $ dollar $600 maibé ajente hanesan xefe departamentu no diretór sira hetan fali dolar $1000.

“Saida mak ne’e. Ne’e, injustsa boot. Sira-ne’e la enfrenta no sira-ne’e la halo atendimentu hanesan médiku sira-ne’ebé atende ema iha izolamentu no kuarentena.  Sá liña frente mak ida-ne’e. Tuur de’it iha kantor maibé remunerasaun boot liu fali sira-ne’ebé halo atendimentu direta,” nia dehan. 

Entretantu, Deputada Bankada CNRT, Bendita Magno, preokupa ho kapasidade Governu ne’ebé to’o oras ne’e seidauk konklui subsídiu ba ekipa liña frente sira.

“Agora Estadu Emerjénsia dala tolu nian hotu tán tiha ona, nusá mak Governu seidauk bele rezolve remunerasaun ba liña frente sira. Problema ne’e iha ne’ebé,” Deputada Bankada CNRT, Bendita Magno, informa liuhosi plenária iha Parlamentu Nasionál, segunda ne’e.

Deputada Bankada CNRT ne’e haktuir, Parlamentu Nasionál aprova ona millaun $250 no foin lalais aprova tán millaun $286.8 maibé to’o oras ne’e seidauk fó solusaun ba ekipa liña frente sira.

Deputada Bankada CNRT ne’e hateten, parte husi F-FDTL no PNTL simu ona maibé sira seluk seidauk.

“Tanbasá mak balun simu ona no balun seidauk, Governu ne’e hasoru problema,” nia hateten. 

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here