Imajen hosi mídia OMS iha TL.

DILI, 29 juñu 2020 (TATOLI) – Organizasaun Mundiál ba Saúde (OMS) oferese treinamentu ba kursu Covid-19 ho plataforma online mak www.OpenWHO.org ho lian-tetun.

Tuir komunikadu ne’ebé Tatoli simu haktuir kursu tolu ba COVID-19 ne’ebé loke uluk iha lian Tetun mak Virus Respiratoriu Emerjente, inklui COVID-19: metodu ba deteksaun, prevensaun, responde no kontrolu, ePROTECT Infesaun Respiratóriu, no Prevensaun ba Infesaun no Kontrolu (IPC) ba COVID-19, no oinsá atu uza Ekipamentu Protesaun Pesoál (EPP).

Plataforma online ne’e nu’udar interativa hodi fahe koñesimentu. Dezde lansa iha 2017, OpenWHO ajuda ona organizasaun atu hato’o koñesimentu ne’ebé bele salva moris ba sira ne’ebé mak iha liña oin iha mundu tomak. Agora dadauk, plataforma ida ne’e iha ema besik tokon 3.7 mak rejista, no loron-loron númeru ida ne’e aumenta ba beibeik.

OMS Timor-Leste servisu hamutuk ho sentru OMS nian iha Genebra atu dezenvolve kursu hirak ne’e iha Tetun.

“OMS dedika nia án ba hetan koñesimentu foun kona-ba oinsá salva ita nia moris hosi COVID-19 ba sira ne’ebé atende no servisu iha liña oin, ami hala’o ami nia servisu tuir valór sira hanesan fó asesu no igualidade, la haree ba ema ne’e hela iha ne’ebé de’it iha mundu”, katak Xefe Aprendizajen no Dezenvolvimentu ba Kapasitasaun, Gaya M Gamhewage.

Gamhewage ne’ebé daudaun hakna’ar iha sede OMS-Jenebra, hatutan: “Ami presiza prodús materiál iha lian ne’ebé prefere, no mós iha format ne’ebé fasil atu kompriende”.

Nia akresenta koñesimentu ne’ebe hato’o hosi dalan ne’e bele haforsa nasaun sira no ajuda salva moris, liuhosi kolaborasaun ho OMS iha kada nasaun hamutuk ho Ministériu Saúde no mós voluntáriu ne’ebé tradús ona lia-fuan tokon 4.5 ne’ebé liu lian 35 ba kursu 13.

“Ho orgullu ami lansa kursu foun hirak ne’e iha Tetun atu suporta oinsá responde ba COVID19 iha Timor-Leste”, afirma.

Kursu sira iha Tetun hirak ne’ebé sei tuir mak klínika ba kuidadu infesaun respiratóriu aguda grave (Clinical Care Severe Acute Respiratory Infection) no instala projetu kona-ba tratamentu ba respiratóriu aguda grave (SARI, sigla inglés).

“Bazeia ba artigu sientífiku no atualizasaun iha koñesimentu mak sei nafatin sai hanesan medidas importante iha luta hasoru COVID-19. Hosi halo kursu hirak ne’e loke ho lian Tetun ba pesoál saúde sira, sai hanesan hakat bo’ot ida ba oin, harii kapasidade no prepara sira atu responde ho efetivu. Ha’u mos presiza aumenta tan katak ida ne sei la sai susesu se lahetan apoiu finanseiru hosi USAID”, haktuir Rajesh Pandav, Reprezentante OMS iha Timor-Leste.

Kursu OpenWHO oferese ho gratuita ba ema ne’ebé de’it mak rejista ho sira nia kontaktu e-mail rasik. Liután mak, kursu OpenWHO la ansi ita, katak ita la bele kompleta kursu ida ne ho ita ida-idak nia tempu. Ita mós bele asesu OpenWHO liuhosi telemovel, ba iOS no mós Androids. Ba Android usa link ida ne’e no ba Apple uza link ida ne’e atu bele download no instala aplikasaun ne’e. (ki)

HAKEREK NO HATÁN

Please enter your comment!
Please enter your name here