Lansamentu label foun iha Foos karon lokál Timór iha edifísiu MAP, Comoro. Imajen/Mídia-MAP

DILI, 29 juñu 2020 (TATOLI) – Ministériu Agrikultura no Peska (MAP) liuhosi Diresaun Nasionál Agro Komérsiu lansa label foun iha foos karon lokál Timór, ne’ebé porsentu 100 hanesan foos rai lokál ne’ebé maka durante ne’e prodúz husi Asosiasaun Agrikultór CAAKUB no WEBABA.

“MAP halo lansamentu ba label foun iha foos Timór, ne’ebé uza karon foun ho dezeñu Timór. Banhira ita prodúz foos lokál iha rai-laran, ita bele uza karon ida-ne’e tanba ba oin ita iha hanoin bele prodúz barak liután atu nune’e timor-oan hotu bele konsumu  hodi  ita labele depende de’it ba foos rai-li’ur,” tenik Sekretáriu Jerál MAP, César José da Cruz, hafoin lansamentu iha edifÍsíu MAP, Comoro, foin lalais ne’e.

Daudaun ne’e MAP servisu hamutuk ho Ajénsia Kooperasaun Internasionál Japaun (JICA, sigla inglés) no Programa Ai-han Mundiál Nasaun Unida (WFP, sigla inglés) atubele hadi’a kualidade produsaun label no karon.

“Ita iha obstaklu barak bainhira atu prodúz tanba iha diferénsia presu foos mutin ho metan, maibé ida-ne’e filafali ba konsumidór sira ne’ebé mak hakarak han foos,” nia akresenta.

Foos rai ne’e prodúz husi povu agrikultura Munisípiu Bobonaro no mós  husi munisípiu sira seluk atu mai fa’an iha loja agrikultór iha Dili.

“Ita sei tau fali ba karon ne’ebé prodúz hafoin maka fa’an iha loja agrikultór sira hanesan mós restaurante sira balun ne’ebé maka parseria ho ita,” nia informa.

Ho nune’e, Sekretáriu Jerál mós apela ba povu tomak liu-liu funsionáriu agrikultura sira atu sosa foos lokál sira husi povu agrikultór sira.

Iha fatin hanesan, Diretór Nasionál Agro Komérsiu, Fernando Egídio Amaral, informa foos rai hirak ne’e daudaun iha ona loja agrikultór ne’ebé konsumidór sira bele ba sosa.

“Ita-nia produtu lokál ninia kuantidade atu responde ba merkadu lokál ita seidauk atinje tanba konsumidór  iha Timór  tinan ida presiza kuaze tonelada 100.000, maibe ita iha esperansa katak ba oin ita bele prodúz kuantidade natoon atubele responde konsumidór ne’ebé mak presiza duni,” nia adianta.

Durante ne’e, Governu hetan apoiu fundu husi Banku Dezenvolvimentu Aziátiku (ADB, sigla portugés) no ajénsia internasionál sira atu sosa husi grupu asosiasaun sira husi Oebaba, Raibere, Uatulari, Uatukarbau no Tono hodi fornese ba loja agrikultór tonelada 3.000 to’o 4.000.

Tuir nia, produsaun foos rai kada saku ida hamutuk kilograma 10 ne’e fa’an ho presu $11,50, kilograma 25 ho folin $26,50, ne’ebé kualidade foos garantidu porsentu 100 la kahur ho kímiku.

Reprezentante JICA iha Timor-Leste, Masafumi Nagaishi apresia MAP no mós ekipa ne’ebé mak iha komitmentu boot tebes hodi promove foos iha rai-laran.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here