Nakroma atraka iha realokasaun urjente terminal ró iha Portu Dili. Imajen Tatoli/Florêncio Miranda Ximenes

DILI, 29 juñu 2020 (TATOLI) – Prezidente Asosiasaun Mariñeiru Timor-Leste (AMTL), Cimplicio Marcos Ximenes, husu ba Governu atu dignifika traballadór timor-oan ne’ebé servisu kaer ró hodi bele hetan saláriu di’ak.

“Ami nu’udar organizasaun ne’ebé halibur ona mariñeiru iha área oinoin hamutuk ema na’in-145 ne’ebé rejistu ona hakarak hato’o ami-nia preokupasaun haat hanesan, dahuluk husu ba Governu atu dignifika traballadór mariñeiru timor-oan ne’ebé servisu iha ró ahi ne’ebé tula pasajeiru hanesan Lajo Lajo, Success no Nakroman hodi fó saláriu ne’ebé tuir lei traballadór no hatur tuir koñesimentu, risku no abilidade ne’ebé iha,” dehan dirijente ne’e ba Agência Tatoli iha Bairro Pité, segunda ne’e.

Daruak asosiasaun ne’e husu ba Ministériu Transporte no Komunikasaun (MTK) liuhosi Diresaun Nasionál Transporte Marítima hodi tau planu asaun ruma atu hahú utiliza rekursu umanu timor-oan hodi servisu tuir ró hirak ne’ebé hala’o operasaun iha tasi timór tuir posizaun ne’ebé sira bele asume no mós halo ona prosesu regenerasaun iha servisu marítimu nian.

Datoluk AMTL hakarak hato’o apresiasaun ba Governu tanba halo ona esforsu tomak hodi aprova ratifikasaun  ba konvesaun  Orgnizasaun Internasionál Marítima nian hanesan STCW, SOLAS, MARPOL no mós rejitrasaun ba ró nian.

“Ida-ne’e hanesan pasu ne’ebé importante tebes ba dezenvovimentu marítima Timor-Leste nian,” nia aresenta.

Kuartu Prezidente AMTL, hateten hanesan benefisiáriu ba konvensaun hirak ne’e, asosiasaun ne’e sei la’o tuir nafatin prosesu tomak kona-ba konvensaun hirak ne’e to’o nia rohan.

Iha okaziaun ne’e mós nia felisita mariñeiru timor-oan sira, relasiona ho loron mariñeiru iha 25 juñu.

“Hakarak fó apresiasaun no parabeniza mariñeiru timor-oan tomak ne’ebé servisu iha rai-laran no mós rai-li’ur,” tenik Cimplicio.

AMTL harii iha fevereiru 2019 no daudaun ne’e kompleta ona nia ezisténsia ba tinan-ida no durante mandatu asosiasaun refere halo ona advokasia no fó formasaun barak ba mariñeiru timor-oan sira hodi eleva sira-nia koñesimentu iha área mariña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here