Ministra Saúde foun, Odete Maria Freitas Belo hamutuk Brigadeiru Jenerál João Miranda ‘Aluc Descartes’ sorumutuk ho ekipa Gabinete Jestaun Krize hodi ko’alia Koordenasaun servisu situasaun COVID-19, iha CCD, segunda (04/06). Imajen Tatoli/Egas Cristovão

DILI, 29 juñu 2020 (TATOLI) – Primeiru-Ministru (PM), Taur Matan Ruak iha tersa (30/06) sei halo enseramentu ba Sala Situasaun Sentru Integradu Jestaun Krize (GIGC, sigla portugés), iha tuku 10:00 dader iha Sentru Konvensaun Dili (CCD, sigla portugés).

Relasiona ho seremónia enseramentu ne’e, Segundu Komandante Operasionál CIGC, Brigadeiro Jenerál, João Miranda ‘Aluc Descartes’, hasoru malu ho Xefe Governu hodi husu prezensa Xefe Governu.

“Tanba Estadu Emerjénsia ramata ona no Sala Situasaun nia ezisténsia mós ramata ona, tanba ne’e mai hasoru Primeiru-Ministru hodi ba halo enseramentu ba Sala Situasaun,” dehan Aluc Descartes iha Palásiu Governu, segunda ne’e.

Iha loron 21 marsu, PM Taur asina Diploma Ministeriál númeru 14/2020, loron 31 fulan-marsu, kona-ba estabelesimentu Sala Situasaun CIGC no despaisu ba nomeasaun estrutura sira ba luta kontra COVID-19.

Diploma Ministeriál ne’e estabelese ho baze tuir lei númeru 2/2010, loron 21 abríl, kona-ba Lei Seguransa Nasionál hodi kria CIGC nu’udar órgaun espesializada asesoria no konsulta ba koordenasaun téknika operasionál ba entidade sira ne’ebé kompoin iha Sistema Integradu Seguransa Nasionál.

Dispostu iha númeru 2, artigu 38.º hosi Lei n.o 2/2010, loron 21 fulan-abríl, CIGC bele funsiona hanesan Sala Situasaun iha kazu ezesaun konstitusionál ne’ebé previstu iha lejizlasaun Estadu Sítiu ka Estadu Emerjénsia. 

Sala Situasaun organiza ba unidade ualu hanesan komandu operasionál, estadu maiór koordenadór, forsa tarefa (liña ministeriál sira) ba prevensaun no mitigasaun pandemia Covid-19, koordenasaun ofisiál ligasaun ba forsa tarefa sira, ekipa estudu no análiza ba risku, sekretariadu ba administrasaun no finansa, destakamentu reasaun rápida no unidade informasaun públika no estrutura iha Sala Situasaun hamutuk na’in-10.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here