Ofisiail Funsionariu husi Ministeriu Solidaderidade kontinua halao pagamentu subsidiu 200 dolar ba komunidade sira iha Sede Suku Bairo Pite, Dili, Kuarta 25 Juinu 2020. Imajen/Antonio Goncalves

DILI, 29 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto hateten, aban, ekipa nasionál sei dezloka ba Rejiaun Administrativa Espesiál Oé-Cusse Ambeno (RAEOA) hodi halo sensibilizasaun no formasaun programa pagamentu subsídiu $200 ba komuidade sira iha RAEOA.

Notísia Relevante: Hahú 04 Jullu, Pagamentu Subsídiu $200 Ba RAEOA

Nia hatutan, hafoin iha loron 01 jullu 2020, ekipa MSSI sei fó formasaun ba ekipa pagamentu sira iha RAEOA ne’ebé mak autoridade RAEOA prepra tiha ona, ho objetivu oinsá mak utiliza tablet ba rejistu pagamentu ne’e.

“Ita tenke fó formasaun ba ita-nia ekipa pagamentu sira iha RAEOA, tanba ita-nia prosesu pagamentu uza tablet no ekipa pagamentu ne’e la’ós hosi Nasionál mak bá maibé ekipa ne’e hosi RAEOA nian rasik,” dehan Rui Manuel Gago Exposto ba Agência TATOLI iha nia knaar fatin MSSI, Caicoli, Dili, segunda ne’e. 

Nia hateten, presiza fó mós formasaun ba xefe suku no xefe aldeia sira tanba sira mós atrapalla bainhira sira prenxe deklarasaun ba reklamante sira-nian. Tanba ne’e, nia dehan, mak ekipa nasionál hakarak fó formasaun no sensibilizasaun molok implementa programa refere.

“Ita-nia ekipa hosi RAEOA inklui ho autoriadde komunitária sira presiza hatene oinsá atu atende benefisiáriu iha mumentu ne’ebé mak rejistu ka halo pagamentu ba ema, tanba ita-nia programa ida-ne’e uza sistema tablet ne’e. Molok atu halo pagamentu, ami sei fó uluk formasaun ba sira bainhira tun ba terrenu,” nia dehan. 

Nia esplika, objetivu hosi formasaun ne’e atu prepra di’ak liután bainhira halo pagamentu, atu nune’e labele iha fallansu iha implementasaun subsídiu $200 nian iha terrenu.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here