Traballadór servisu umanitáriu WFP to’o iha iha Aeroportu Comoro ho aviaun charter Malaysia Airlines, domingu (28/06). Imajen Tatoli/António Gonçalves

DILI, 28 juñu 2020 (TATOLI) – Voo datoluk ho Malaysia Airlines ne’ebé oferese servisu aéreu umanitáriu husi Programa Ai-han Mundiál Nasaun Unida (WFP, sigla inglés) iha domingu lorokraik tuku 15:00 ne’e to’o iha Aeroportu Internasionál Prezidente Nicolau Lobato, Comoro.

Country Director WFP iha Timor-Leste Dangeng Liu, hateten voo ne’e nu’udar asisténsia umanitária hodi halo intervensaun kombate surtu COVID-19 iha Timor-Leste.

 

Country Director WFP iha Timor-Leste Dangeng Liu. Imajen Tatoli/António Gonçalves

“Ohin ami tula de’it traballadór fó asisténsia umanitária WFP nian hamutuk ema na’in-12. Voo ne’e nu’udar datoluk husi asisténsia umanitária ne’ebé aluga husi WFP ne’ebé maihusi Kuala Lumpur, Malázia atu kontribui ba abastesimentu sasán médiku husi rai-liur no mós movimentu traballadór umanitáriu no médiku,” tenik Dangeng Liu ba Agência Tatoli iha Aeroportu Comoro.

Notísia Relevante: WFP Oferese Servisu Aéreu Umanitáriu ba Timor-Leste Dala Tolu De’it

Nia dehan, ajuda ne’e ho objetivu tanba organizasaun mundiál ne’e haree laiha atividade voo komersiál internasionál no aeroportu sira taka.

“WFP ho inisiativa hakarak aluga aviaun hodi ajuda nasaun sira iha mundu ne’ebé afeta krize pandemia COVID-19 liuhosi ajuda umanitária hodi oferese ekipamentu médiku ba prevensaun surtu no haruka traballadór umanitáriu hodi fó asisténsia ba nasaun afetadu sira,” nia akresenta.

Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Nia dehan, voo ohin nu’udar kontinuasaun voo loron 14 juñu no 21 juñu, liuhosi koopersaun ne’ebé WFP no Governu Timor-Leste konkordánsia no ohin nu’udar voo ikus.

“Asisténsia ne’e sei la to’o iha ne’e de’it maibé sei kontinua iha jullu no aviaun ne’ebé maka WFP aluga husi Malázia sei lori tan ekipamentu médiku sira maibé ami sei haree hamutuk ho Governu Timor-Leste,” Country Director WFP ne’e subliña.

Nia haktuir, voo dahuluk iha 14 juñu lori ekipamentu médiku ba prevensaun COVID-19 nian hamutuk kaixa 134 no traballadór  asisténsia umantária.

Enkuantu, iha voo daruak ne’ebé akontese iha 21 juñu lori ekipamentu COVID-19 nian hamutuk kaixa haat, ne’ebé fó ba World Vision.

Bainhira WFP hahú halo intervensaun iha 1 maiu konsege transporta ona pasajeiru hamutuk 3.000 resin, ne’ebé semo ona bá destinasaun hamutuk 40. 

Relasiona ho transporte kargo, WFP tula ona sasan umanitáriu no saúde hamutuk metru kúbiku 17.000 ba nasaun 130 lori organizasaun na’in-33 nia naran.

Hahú husi loron ikus janeiru, WFP, Organizasaun Mundiál ba Saúde (OMS) no komunidade internasionál hahú haruka ona sasán umanitáriu inklui médiku ba nasaun 121 husi sentru lojístiku globál no rejionál, inklui Kuala Lumpur no Guangzhou, Xina, ne’ebé lokaliza iha Ázia.

Iha Ázia no Pasífiku, voo ne’ebé aluga husi WFP fó ona apoiu ba intervensaun hasoru COVID-19 iha Afghanistaun, Bangladesh, Laos, Myanmar, no Nepál, maibé iha fatin balun servisu umanitáriu ne’e hetan suspensaun ona desde marsu tanba pandemia.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here