Komisáriu Adjuntu ba Asuntu Investigasaun Kriminál iha CAC, Augusto Castro. Imajen Tatoli/Cipriano Colo.

MANUFAHI, 26 juñu 2020 (TATOLI)–Artigu 25 iha Projetu Lei númeru 1/V/I-Lei Antí Corrupção (LAC) sesaun hitu (VII), kapítulu Primeiru (I), kona-ba medida Jerál Sira Prevensaun Nian, ko’alia kona-ba Formasaun jornalista no jornalizmu investigativu atu hola parte iha prevensaun.

Notísia Relevante: Komisaun A Aprova LAC Kapítulu Primeiru “Medida Jerál Sira Prevensaun Nian”

Hafoin artigu ne’e hetan aprovasaun, Komisáriu Adjuntu ba Asuntu Investigasaun Kriminál iha CAC, Augusto Castro, hateten relasiona ho artigu 25 ne’ebé liga ho mídia nian ne’ebé engloba ona iha Lei Antí Corrupção (LAC), iha parte medida preventiva nian, ida-ne’e hanesan oportunidade di’ak ne’ebé  fó espasu naton ba CAC atu koopera mutualmente ho instituisaun mídia sira liuliu área jornalizmu.

Kooperasaun mutualmente ne’e, komisáriu adjuntu ne’e dehan, atu bele inisia no kria kooperasaun ida, hodi fahe esperiénsia no  koñesimentu ba malu kona-ba jornalizmu investigativu sira ne’ebé maka atu deskobre sai buat ne’ebé mak autoridade sira la konsege hetan.

“Tanba ita haree ba esperiénsia barak iha mundu, iha kazu boboot ne’ebé mak imputa ba iha autoridade sira, ema boot sira, ne’e esforsu hosi mídia ka jornalista sira barak liu mak bele deskobre sai buat ne’ebé ema subar no autoridade la konsege deteta,”  Augusto esplika.

Ba oin, nia dehan, CAC tenke kria kooperasaun ida mutualmente ho mídia atu oinsá servisu jornalizmu ho autoridade sira bele iha kooperasaun, bele ajuda malu deskobre sai rikusoin ruma, produtu krime ruma ne’ebé maka ema ruma subar iha rai laran no rai liur, nune’e ho koneksaun rede jornalizmu investigativu bele fó informasaun ruma.

Nia hateten, iha ona lei seluk ne’ebé temi ona iha artigu 40 ho 41 KRDTL, ko’alia kona-ba liberdade impresna no liberdade atu asesu informasaun. Iha artigu 25 LAC nian, nia dehan, mai reforsa tan jornalista no entidade mídia sira bele iha forsa liután, atu bele husu dokumentu públiku sira ne’ebé maka ba interese sira públiku ninian, menu ba interese seguransa nasionál nian.

Maibé, tuir nia, kuandu imputa katak deskonfia iha kazu korrupsaun ruma, entaun bele mós asesu ba dokumentu sira, atu bele deteta bainhira iha produtu ruma mai hosi krime ne’ebé ema ruma aproveita ka subar iha ninia funsaun sira ne’ebé mak nia kaer.

“Iha parte balun ita sei xave aan iha segredu de justisa. Maibé, iha parte balun mós kuandu sobre sai ona informasaun sira ne’ebé mak iha no autoridade investigativu sira tuir ona ida-ne’e, ita bele uza segredu justisa. Antes tama iha prosesu investigatigasaun mídia sira mós ih papél importante atu buka, deteta, dokumentus, ema no mós ninia produtu sira ne’ebé mak deskonfia mai hosi krime. Bele kobre sai, bainhira autoridade tama ona iha ninia abreviguasaun, ninia investigasaun ne’e ita bele limita ninia asesu ka alargamentu hosi públiku. Kuandu investigasaun liu tiha, provas hotu, faktus sira ita rekolla hotu, ba ona iha julgamentu ne’e depende ona ba juiz sira atu loke ba públiku hodi halo audiénsia públiku atu bele mai tuir ninia andamentu kazu ne’e,” nia hateten tan.

Notísia Relevante: CAC Kongratula Komisaun A Aprova Ona Dispozisaun Legál Medida Preventiva LAC

Entretantu, kona-ba artigu ne’e, Asessór Jurídiku Komissaun A Parlamentu Nasionál, Anildo da Cruz, hateten formasaun iha mós objetivu hodi haforsa kompeténsia iha área ne’ebé liga ba rejime jurídiku atu asesu ba informasaun.

“Dalaruma ema barak hakarak taka imformasaun kona-ba lei ne’ebé fó asesu informasaun ba jornalista sira. Tanba ne’e, Jornalista sira tenke domina atu bele uza ida-ne’e. Ida-ne’e sai hanesan maneira ida atu potensialiaza no viabiliza sira nia ezersísiu, buka hetan, publika no disemina informasaun justa no rigoroza,” Anildo hateten.

Jurista ne’e esplika, hanesan jornalista sira rona informasaun no hakarak halo investigasaun kona-ba kontratu ida-ne’ebé taka ba públiku, ezemplu hanesan Pedro nu’udár diretór aprovizionamentu fó projetu ida ba Paulo maibé laiha kontratu no jornalista ne’e hakarak hakerek maibé nia rona de’it hosi ema, entaun jornalista ne’e labele hakerek notisia bazeia de’it ba informasaun ne’ebé mak nia rona.

“Lei de asesu informasaun ida-ne’e fó direitu ba jornalista atu bele ba iha ministériu kompetente no husu katak, ha’u hakarak atu halo kobertura no hakarak halo investigasaun ba asuntu ne’e. Ha’u hakarak atu hakerek informasuan ne’e tuir ninia verdade. Bainhira jornalista ne’e laiha asesu, entaun nia labele hakerek tanba nia rona de’it, tanba ne’e lei ne’e rasik fó direitu ba jornalista atu asesu ba informasaun ne’ebé los tuir artigu 25,”  Jurista Anildo fó ezemplu.

Bainhira ministériu ne’e ka parte kompetente mak lakohi fó informasaun. nia dehan, nu’udár direitu jornalista nian atu hetan tuir artigu ne’ebé hakerek iha lei CAC parte prevensaun nian, jornalista iha mós direitu atu bele lori ba tribunál katak ministériu ne’e la fó dokumentu ka informasaun ne’ebé jornalista ne’e rasik husu atu halo ninia notísia.

“Tanba lei ne’e fó direitu ba jornalista atu asesu ba informasaun no dokumentu importante sira ne’ebé iha ligasaun ho notísia ne’ebé nia hakarak hakerek,” nia dehan. 

Nia esplika, iha alinea primeiru hosi artigu 25 ne’ebé hateten kona-ba formasaun ba jornalista iha área espesífika ba korrupsaun, liu-liu jornalizmu investigativu iha área korrupsaun nian.

“Objetivu hosi formasaun ne’e atu nune’e jornalista bele hakle’an oinsá halo investigasaun ba asuntu korrupsaun nian, kompeténsia ténkina ba investigasaun kazu korrupsaun  no sira nia direitu ba asesu dokumentu públiku, ida-ne’e hanesan jornalista sira nia diretu ne’ebé tenke atinji,” nia esplika.

Lei Antí Corrupção (LAC) artigu 25 ne’e kompostu hosi alinea rua (2) ho nia testu orijinál ne’ebé hakerek ho lian Portugés no seidauk iha tradusaun ofisiál ba lian Tetum, hanesan tuir mai ne’e.

Artigo 25

Formação de Jornalistas e jornalismo de Investigação

  1. A comissão Anti Corrupção promove, incentive e realiza ações de formação de jornalistas para promover a competência e a indepenência do jornalismo e do seu papel como fonte competente e credível de informção e de educação do público sobre a corrupção e os esforços para o seu combate.
  2. A formação visa igualmente o competente domínio e utilização do regime juridíco de acesso à informação por parte dos jornalistas, como modo de potencializar e viabilizar na prática o exercício da sua liberdade de procurar, receber, publicar e difundir informação justa e rigorosa sobre a corrupção.

Artigu ida-ne’e, maski seidauk tama em vigór maibé Komissaun A konsege aprova ona, tanba artigu ne’e rasik tama iha sesaun hitu (VII) kapítulu Primeiru (I), kona-ba Medida Jerál Sira Prevensaun Nian.

Notísia Relevante: Opozisaun Vota A-Favór ba LAC “Medida Jerál Prevensaun”

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here