Kooperativa Agríkola. Imajen/Espesiál

DILI, 27 juñu 2020 (TATOLI) – Sekretáriu Estadu Kooperativa foun, Elizário Pereira, hateten durante mandatu tinan-tolu nia parte harii no hadi’a di’ak liután kooperativa rai-laran.

“Ha’u la foun iha koperativa, ha’u mai atu halo kooperativa. Programa dahuluk maka atu harii kooperativa foun, atu hadi’a kooperativa, atu habelar koperativa ba ema hotu no ha’u hanoin katak iha tinan-tolu nia laran atu hasae membru  koperativu mínimu 150.000 to’o 250.000,” dehan Sekretáriu Estadu Elizário Pereira, hafoin seremónia entrega servisu husi Sekretáriu Estadu Kooperativa sesante, Arsénio Pereira, iha edifísiu Akait, foin lalais ne’e.

“Bainhira ita bele halo ida-ne’e, ita bele halibur kapitál mínimu millaun $250 to’o millaun $450. Atu realiza mehi ne’e ha’u presiza ita bo’ot sira nia kooperasaun,” nia akresenta.

Governante ne’e iha planu sei estabele kooperativa ida iha postu administrasaun ida atu nune’e bele hamutuk ho komunidade iha baze bele sente kooperativa.

Hafoin seremónia entrega servisu durante tinan-rua, Sekretáriu Estadu Kooperativa sesante Arsénio Pereira, iha esperansa Sekretáriu Estadu foun sei kontinua ninian obra ne’ebé durante tinan-rua nia halo ona.

“Ha’u labele halo avaliasaun ba ha’u-nia an rasik, maibé ha’u espera obra ne’ebé iha ona bele kontinua,” nia subliña.

Bazeia ba dekretu lei númeru 16/2004 iha tipu kooperativa 13 ne’ebé presiza estabelese iha Timor-Leste, maibé foin maka iha neen.

Daudaun ne’e kooperativa iha Timor-Leste hamutuk 191, husi ramu neen hanesan kréditu uniaun, multi sektorál, agrikultura, peska, pekuária no indústria.

Ramu kooperativa ne’ebé iha hanesan kréditu uniaun ho totál 96 ho nia totál kapitál $6.125.496,56 husi membru hamutuk 12.679 no iha haat mak hetan apoia husi orsamentu subvensaun públika no maioria halibur osan husi komunidade sira.

Multi sektorál hamutuk 52 ho totál kapitál $515.413,57 husi membru hamutuk 1.642, Agrikultura iha 19 ho kapitál $52.213, 25 husi membru 368, peska iha 15 ho totál kapitál hamutuk U$24.122,52 ho nia membru 369.

Nune’e mós, pekuária iha 3 ho totál kapitál $982.000 ho membru 185 no indústria ho totál kapitál $17.899 ho membru hamutuk 83.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here