VIII Governu Konstitusionál realiza retiru iha sala Ministériu Finansa, Aitarak-Laran, sábadu (27/06). Imajen/Mídia-GPM

DILI, 27 juñu 2020 (TATOLI) – VIII Governu Konstitusionál realiza retiru durante loron-rua (sesta no sábadu) ho objetivu atu konkretiza vizaun governasaun nian, hafoin kompleta estrutura.

Atividade ne’e realiza  iha sala Ministériu Finansa (MF), Aitarak-Laran no hetan partisipasaun másimu husi Membru Governu tomak no retiru ne’e rasik la fó asesu ba mídia sira.

Ministru ba Prezidénsia Konsellu Ministru, Fidelis Manuel Leite Magalhães, hateten retiru ne’e hala’o durante loron rua no prezide husi Primeiru-Ministru, Taur Matan Ruak, ne’ebé iha loron dahuluk ko’alia kona-ba konseitu Estadu no haree ba asuntu estratéjia no polítika.

Enkuantu, loron daruak nian iha parte dader rona aprezentasaun husi reprezante Organizasaun Nasaun Unida (ONU) iha Timor-Leste, Programa Nasaun Unida ba Dezenvolvimentu (PNUD) no iha parte lorokraik rona orientasaun husi Xefe Governu.

ONU no PNUD halo aprezentasaun kona-ba indikadór umanu iha Timor-Leste.

Nune’e mós, reprezentante Banku Sentrál aborda kona-ba Timor-Leste ninia ekonomia no kona-ba tipu modelu jestaun.

“Ami mós rona aprezentasaun husi Banku Sentrál Timor-Leste ne’ebé hato’o informasaun kona-ba ita-nia makro ekonómika. Entaun oinsá situasaun no projesaun ita antisipa ita-nia hakat ba oin ein termu dezenvolvimentu ekonómika. Ha’u rasik mós halo aprezentasaun kona-ba prosesu inisiativa reforma no intensaun ba oin,” relata Fidelis.

Governante ne’e haktuir, iha sesaun ikus nian, rona liña orientasaun husi PM Taur kona-ba governasaun ne’e oinsá maka atu la’o ba oin no prioridade importante sira ne’ebé maka tenke sai prioridade ba Membru Governu sira atu kontinua hodi atinje durante governasaun ne’ebé tuir Konstituisaun.

“Retiru ne’e realiza tanba importante atu ezekutivu tomak  bele simu orientasaun husi Xefe Governu tanba ita hatene katak Membru Governu sira servisu maka’as hodi bele konkretiza vizaun no objetivu governasaun nian,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here