Ofisiail Funsionariu husi Ministeriu Solidaderidade kontinua halao pagamentu subsidiu 200 dolar ba komunidade sira iha Sede Suku Bairo Pite, Dili, Kuarta 25 Juinu 2020. Imajen/Antonio Goncalves

DILI, 25 juñu 2020 (TATOLI)–Xefe Suku Camea, Matos da Costa, informa xefe família iha Suku Camea hamutuk 679 mak seidauk simu subsídiu $200 mak iha aldeia rua (2) ne’ebé mak to’o agora seidauk simu subsídiu $200, tanba naran la taka sai iha lista naran benefisiáriu nian.

Notísia Relevante: Pagamentu iha Loron 15, Ekipa Pagamentu Rejistu Reklamasaun Hamutuk 11.289

“Ha’u-nia aldeia rua, Ailele-Hun ho totál uma-kain hamutuk 285 no Has-Laran iha 394 to’o agora seidauk simu pagamentu subsídiu $200 hosi Governu tanba sira-nia naran la taka sai duni iha lista benefisiáriu nian. Maibé ha’u tenta ona ba Ministériu Administrasaun Estatal (MAE) atu verifika fila fali dadus, nune’e komunidade iha aldeia rua mós bele hetan sira-nia direitu,”  dehan Xefe Suku Camea, Matos da Costa, ba  Agência TATOLI via telefónika, kinta ne’e. 

Nia hatutan, parese xefe família iha aldeia rua ne’e konklui ona reklamasaun nian hodi simu iha segunda faze nian, hanesan mós ho komunidade sira seluk ne’ebé simu ona nia direitu ba subsídiu uma-kain nian ne’e. 

Entretantu, Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hatán preokupasaun kona-ba pagamentu subsídiu $200 ne’e katak komunidade sira-ne’e sei simu pagamentu subsídiu iha segunda faze nian.

“Ha’u foin simu ona dokumentu hosi MAE kona ba xefe família ne’ebé seidauk simu pagamentu subsídiu $200 nian. Katak, sira sei simu iha segunda faze nian depois de pagamentu iha Oé-Cusse,” Diretór Jerál MSSI ne’e hateten.

Nia haktuir tan, la’ós aldeia rua hosi Suku Camea nian de’it, maibé hosi Suku Culuhun, Aldeia Tanemutu iha uma-kain 156, Suku Akadiru-Hun, aldeia Nuu-badak iha uma-kain 102.

“Ita garante sira-ne’e sei simu tanba sira-nia naran tama iha lista maibé la kompletu. Nune’e, ita konsidera sira iha segunda faze,” nia dehan. 

Notísia Relevante: Hahú 04 Jullu, Pagamentu Subsídiu $200 Ba RAEOA

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here