Diretór Jerál Servisu Migrasaun, Superintendente Polísia Agostinho da Silva Gomes. Imajen Tatoli/Eugénio Pereira

DILI, 25 juñu 2020 (TATOLI)- Hahú iha loron kuarta feira (24/06/2020), Diresaun Jerál Servisu Migrasaun Timor-Leste, kuarta liubá, reativa servisu hodi halo atendimentu ba movimentu Timoroan ne’ebé tama mai territóriu Timor-Leste liuhosi fronteira terrestre.

Notísia Relevante : Kada Kuarta, Governu Loke Portaun Fronteira Terrestre

Diretór Jerál Servisu Migrasaun, Superintendente Xefe Polísia, Agostinho da Silva Gomes, informa  sira-nia parte loke fali fronteira tuir dekretu lei Governu númeru 9/2020 hodi halo proibisaun ba sidadaun estranjeiru sira labele tama territóriu Timor-Leste no proibisaun la aplika ba sidadaun Timoroan sira atu tama mai ho livre no kumpre nafatin regra saúde hodi evita-aan hosi propagasaun surtu Coronavirus ka COVID-19.

“Diresaun Jerál Servisu Migrasaun hahú implementa dekretu lei Governu númeru 9/2020, halo proibisaun ba sidadaun estranjeiru sira labele tama territóriu nasionál, maibé proibisaunla aplika ba sidadaun estranjeiru ne’ebé moris iha Timor-Leste no hela iha Timor-Leste,” hateten Diretór Agostinho, ohin, ba Agência Tatoli iha nia knaar fatin, Ministériu Interiór, Vila-Verde, Dili.

Nia dehan, desizaun loke fronteira terrestre Diresaun Jerál Servisu Migrasaun halo tuir Ministru Interiór Filomeno da Paixão de Jesus, hodi loke fronteira iha kada semana ida loke dala ida iha kuarta feira no iha oras-rua nia laran de’it.

Kona-ba númeru abitante sira ne’ebé tama husi Postu Integradu Salele-Covalima, Motain-Batugade,  Sacato no Oesilo Oe-Cusse, Diretór Agostinho dehan, nia parte seidauk simu relatóriu, maibé konfirma ona katak, kuarta ne’e, abitante sira hahú halo movimentu tama Timor-Leste.

“Horiseik númeru seidauk rekolla, maibé ita autoriza ona sidadaun sira tama iha postu integradu migrasaun nian hotu,” Agostinho hateten.

Servisu Migrasaun mós kontinua koopera ho ekipa Ministériu Saúde liuhosi Sala Situasaun Sentru Integradu Jestaun Krize (CIGC-sigla portugés) hodi haree sidadaun sira ne’ebé tama mai tenke kumpre regra saúde nian hodi hela iha kuarentena.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here