Estudante sira hosi Sentru Direitu Ema-nian, UNTL. Imajen mídia UNTL

DILI, 25 juñu 2020 (TATOLI) – Universidade Nasionál Timor Lorosa’e (UNTL) liuhusi Fakuldade Siénsia Sosiál nia Sentru Direitu Ema-nian selesiona husi Uniaun Europea (UE) hanesan projetu ba implementasaun ne’ebé ho istória susesu liu husi projetu barak Kampus Globál nian ne’ebé apoiu husi UE.

“Ami ho orgullu hakarak atu fó hatene ba públiku katak iha loron 15 fulan-juñu 2020, Uniaun Europea hili ona projetu ida ne’e hosi projetu barak seluk atu sai istória susesu ba relatóriu kona-ba Direitu Ema-nian no Demokrasia iha 2019 husi Uniaun Europea”, hateten Adriano Remiddi atuál Jestór Projetu Edukasaun no Peskiza Sentru Direitu Ema-nian, iha Kampus Kaikoli UNTL.

Remiddi hatutan susesu refere importante ba Kampus Globál no ba UNTL ne’ebé konsege fó ona formasaun ho susesu ba profesór, investigadór, no funsionáriu, inklui estudante sira ne’ebé potensiál atu sai rekursu umanu iha futuru sentru nian.

“Ita hotu kontente no hetan inspirasaun bazea ba rezultadu husi serbisu maka’as, koordenasaun di’ak tebetebes entre parte sira no tradisaun, prátika, no ezijénsia husi direitu ema-nian iha Timor-Leste. Espera, ida-ne’e sei bele mós fasilita sustentabilidade ba Sentru Direitu Ema-nian foun ida ne’e iha Timor-Leste husi 2021 ba oin”, tenik jestór.

Adriano Remiddi mós rekoñese COVID-19 mak dezafiu ba sentru direitu ema-nian, maibé ekipa halo hela mudansa ba atividade sira atu implementa bainhira universidade autoriza reativasaun atividade prezensiál.

“COVID-19 la fó impaktu ba atividade sira, maibé dezafiu iha tempu de’it. Ami nafatin garante kualidade, liuliu formasaun, prátika i peskiza, tanba ne’e agradese ba Reitór UNTL, Profesór Doutór Francisco Miguel Martins, ne’ebé konsidera prezensa sentru direitu ema-nian nian bele dignifika UNTL no timoroan sira iha implementasaun”, dehan Remiddi.

Dezde 2019, Kampus Globál Direitu Ema-nian ajuda universidade nasionál atu dezenvolve edukasaun direitu ema-nian no peskiza ho estabelesimentu husi sentru direitu ema-nian ho apoiu husi Uniaun Europea.

Instalasaun sentru direitu ema-nian inagura iha agostu 2019 ho prezensa husi Premiadu Nobel ba Dame, José Ramos-Horta, no Ministru Ensinu Superiór, Siénsia no Kultura, Longuinhos dos Santos, hamutuk ho ofisiál seniór sira husi Estadu no dignatáriu internasionál sira.

Objetivu hosi Sentru nian atu habelar direitu ema-nian iha 2021 liuhusi fakuldade sia UNTL nian ne’ebé konsentra ba matéria transversál, dezenvolve matadalan sira ne’ebé sei aprova husi UNTL no sei disponivel iha lian tolu (Tetun, Portugés, no Inglés), no atu envolve iha rede internasionál no atividade peskiza atu sai membru husi Kampus Globál Ázia-Pasífiku hamutuk ho universidade seluk husi ASEAN. (ki)

HAKEREK NO HATÁN

Please enter your comment!
Please enter your name here