Eis Sekretáriu Estadu Juventude no Desportu, Nélio Isaac Sarmento. Imajen Egas Cristóvão

DILI, 25 juñu 2020 (TATOLI)-Eis Sekretáriu Estadu Juventude no Desportu, Nélio Isaac Sarmento, kinta ne’e rekoiñese la konsege implementa hotu programa Governu nian iha área desportu durante ninia mandatu tinan rua.

Planu prioridade tolu maka nia trasa ona atu implementa durante ninia mandatu tinan lima 2018-2023, hanesan dezenvolve infraestrutura iha área desportu, lejislasaun atu dezenvolve talentu juventude iha área desportu no mós transforma mentalidade sosiedade nian ho meiu ida prátika desportu.

Maibé la konsege implementa hotu tanba kestaun polítika ne’ebe maka daudaun ne’e akontese iha rai-laran hodi sai husi estrutura Governu.

“Durante tinan rua ha’u hanoin katak atu implementa planu sira ne’e hotu maibé ita só servisu efetivu ne’e so 2019 de’it tanba ita iha Orsamentu Jerál Estadu maibé 2020 tinan klaran ona ita sei la halo buat ida tanba la’o de’it ho limitasaun ne’ebé ita iha,” dehan Nélio Isaac Sarmento ba Jornalista sira iha SEJD, Dili ohin.

Maski la konsege asume kargu ne’e to’o tinan lima tanba kestaun polítika, maibé Eis Sekretáriu Estadu Komunikasaun Sosiál iha Governu konstitusionál da neen ne’e hateten konsege kontribui dezenvolve infraestrutura iha área desportu hanesan konstrusaun estádiu futeból iha Munisípiu Manatuto ho Dili.

Aleinde ne’e projetu reabilitasaun Jinájiu Dili no Kampu Volly Ball praia ne’e dadauk ne’e besik finaliza.

“Haree loloos ba saida mak ha’u bele kontribui oituan iha tinan rua nia laran ne’e mak ida kona-ba hanesan konklui ona infraestrutura sira desportu ninian maibé barak sei iha problema ita esforsu atu konklui mais labele tanba kestaun legal balun ita tenke kumpre,”tenik Nélio Isaac.

“Parte seluk mak oinsá ajuda haree juventude sira-nia organizasaun tenke forte nune’e bainhira simu osan hosi Governu sira bele iha responsabilidade no haree mós ba programa sira sentru juventude sira agora balu lao no balu seidauk lao no seluk tan,” dehan Nia.

Eis Governante ne’e fiar katak SEJD foun sei kontinua implementa planu ne’ebé la konsege ezekuta durante mandatu tinan rua nia laran.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here