Mídia Na’in sira rona esplikasaun husi Ministru Asuntu Parlamentár no Komunikasaun Sosiál, Francisco Jerónimo, molok selebra akordu, iha sala enkontru MAPKOMS, Palásiu Governu, kinta (25/06). Imajen Tatoli/Natalino Costa

DILI, 25 juñu 2020 (TATOLI) Mídia lima hanesan Casa Produção Audiovisual, Naunil Media, Televizaun Edukasaun (TVE), Maxthal no Rádiu Rakambia hetan apoia finanseira husi Governu atubele hala’o atividade publisidade ba prevensaun COVID-19, nune’e bele konsensializa nafatin komunidade bele prevene-an husi surtu ne’e.

Hafoin asina kontratu ho reprezentante mídia sira, Ministru Asuntu Parlamentár no Komunikasaun Sosiál, Francisco Jerónimo, hateten apoiu finaseira ne’e nu’udar apoiu ba daruak ne’ebé antes ne’e Sekretaria Estadu Komunikasaun Sosiál (SEKOMS) halo ona kontratu ho mídia neen.

Tuir governante ne’e, objektivu husi apoiu ida  ne’e atu fasilita mídia nasionál sira hanesan rádiu, jornál no online sira atu kontribui ba informasaun ne’ebé di’ak liu iha situasaun prevensaun surtu COVID-19.

“Liuhosi apoiu finanseiru oituan ba mídia, sira bele halo publisidade ho maneira prevensaun sira atu konsensializa ita-nia populasaun sira hodi prevene-an nafatin husi surtu COVID-19,” dehan Ministru Francisco Jerónimo iha ninia gabinete,  Palásiu Governu, kinta ne’e.

Notísia Relevante: SEKOMS Halo Entendimentu ho Mídia Na’in Sira Atu Halo Kampaña Prevensaun COVID-19

Iha loron 15 maiu, Sekretáriu Estadu Komunikasaun Sosiál, Merício Juvinal dos Reis ‘Akara’ asina kontratu ho mídia nasionál neen hanesan STL, GMN TV, Timor-Post, Dili Post, Indepedente, no Bisnis Timor atu asesu ba Fundu COVID-19 hodi halo publisidade no disemina informasaun kona-ba COVID-19.

Orsamentu ne’ebé maka SEKOMS prevee iha Fundu COVID-19 bazeia ba proposta maka $207.750, ne’ebé alokadu ba kampaña sensibilizasaun ba medida Estadu Emerjénsia inklui prevensaun no mitigasaun ba COVID-19.

Nia nota katak rai viziñu sira hanesan Indonézia no Austrália sei iha kazu konfirmadu COVID-19, liuliu Timór Osidentál, Indonézia rasik ne’ebé fronteira rai maran besik Timor-Leste, daudaun ne’e númeru moras ne’e aumenta ba bebeik.

Nia konsidera apoia ne’e nu’udar apoia mensál ida husi MAPKOM ba mídia nasionál sira.

“Apoia ida-ne’e sei bebeik kada fulan ba mídia sira iha ámbitu COVID-19, tanba ita hatene katak moras ne’e seidauk hatene loloos bainhira maka hotu. Tanba ne’e papél mídia importante tebes atu divulga informasaun no halo publisidade hodi konsensializa populasaun,” subliña Ministru.

Iha fatin hanesan, Xefe Redasaun TVE, Otelio Otte agradese apoiu finanseiru husi Governu tanba bele ajuda mídia sira halo divulgasaun informasaun no publikasaun ho maneira eduka populasaun sira.

“Ami agradese tebes ba ministériu foun ida-ne’e tanba bele fó apoiu ona ba mídia sira hodi bele transmite informasaun hodi hafanu komunidade sira prevene-an husi surtu COVID-19,” nia tenik.

Nia espera akordu ne’e la to’o de’it ba ohin loron maibé sei kontinua ba futuru.

“Ha’u hanoin apoiu sira hanesan ne’e labele to’o iha ne’e de’it maibé kontinua nafatin atu nune’e mídia sira bele halo servisu ho di’ak liután,” nia akresenta.

Seremónia asina kontratu apoiu finasiamentu ba publikasaun mídia na’in-lima asina direita husi mídia-na’in sira no Ministru Francisco Jerónimo.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here