Primeiru-Ministru, Taur Matan Ruak prezide reuniaun Komisaun Interministeriál estraordinária iha Palásiu Governu, kinta (25/06). Imajen Tatoli/António Gonçalves

DILI, 25 juñu 2020 (TATOLI) – Governu liuhosi reuniaun Komisaun Interministeriál estraordinária deside hakotu Estadu Emerjénsia (EE) faze datoluk ne’ebé sei ramata iha 26 juñu, tuku 23:59, tanba laiha ona nesesidade atu estende tan no laiha ona kazu ativu COVID-19.

Iha ámbitu reuniaun Komisaun Interministeriál koordenasaun atu implementa medida sira ba prevensaun no kontrolu ba COVID-19, ekipa Sentru Integradu ba Jestaun Krize (CIGC, sigla portugés) hato’o relatóriu ba Primeiru Ministru, Taur Matan Ruak, ne’ebé lidera komisaun ne’e.

Segundu Komandante Operasionál CIGC, João Miranda ‘Aluc Descartes’, deklara rezultadu husi reuniaun ne’e katak sei la estende tan EE ba faze dahaat, maibé sidadaun sira ne’ebé husi nasaun afetadu COVID-19 no ultrapasa fronteira terrestre ka aeroportu mai territóriu nasionál, nafatin tenke kumpre kuarentena obrigatóriu ne’ebé Governu estabelese durante loron-14.

“Laiha nesesidade atu halo estensaun ba situasaun emerjénsia tan, maibé la signifika katak Governu la hola medida atu prevene nafatin moras COVID-19. Tanba ne’e responsabilidade nafatin atribui ba Ministériu Saúde,” relata Segundu Komandante Operasionál CIGC, hafoin reuniaun iha Palásiu Governu, kinta ne’e.

Maski laiha ona EE, maibé Ministériu Saúde sei kontinua hala’o serbisu tuir alterasaun dahuluk ba Lei númeru 10/2004, 24 novembru nian, Lei Sistema Saúde ne’ebé aprova ona iha reuniaun Konsellu Ministrus iha, ne’ebé sei fó autoridade kompetente sira iha matéria vijilánsia epidemolójiku no sanitáriu atu uza mekanizmu protesaun ba saúde públika.

Nia dehan, haree ba tempu implementasaun EE kuaze ramata maka CIGC hato’o relatóriu ba komisaun.

“Aban kalan oras 23:59 períodu Estadu Emerjénsia hotu, tanba ne’e maka ami hosi Sala Situasaun mai hasoru Komisaun Interministeriál hodi hato’o relatóriu atividade ne’ebé Sala Situasaun hala’o hahú hosi Estadu Emerjénsia to’o ramata, kona-ba relatóriu ne’e tempu badak Governu sei fó sai,” nia akresenta.

Kona-ba sidadaun sira ne’ebé tama mai Timor-Leste, Segundu Komandante Operasionál CIGC ne’e esplika, tuir medida protokulár katak sei obedese nafatin, sidadaun sira ne’ebé tama mai Timor-Leste tenke kumpre kuarentena obrigatóriu ne’ebé Governu prepara.

Relatóriu husi CIGC sei lori ba aprezenta ba Parlamentu Nasionál iha loron 30 fulan Juñu 2020.

Iha reuniaun, Xefe Governu deside hakotu mós serbisu Komisaun Interministeriál nian hodi transfere fali ba iha Konsellu Ministru, maibé nafatin reforsa kontrolu sira iha liña fronteriza rai maran nian hodi evita importasaun kazu foun.

Aluc deside mandattu CIGC sei ramata tanba EE laiha ona, maibé Ministériu Saúde sei hola responsabilidade tomak hodi haree ba asuntu saúde públika, liuliu ba prevensaun no propagasaun COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here