Prezidente KFP, Faustino Cardoso. Imajen António Goncalves

DILI, 24 juñu 2020 (TATOLI)–Komisaun Funsaun Públika (KFP), ohin, hamutuk ho Institutu Nasionál Aadministrasaun Públika (INAP), Institutu Defeza Nasionál (IDN) no mós ho inspetór no diretór sira hosi liña ministerial inklui ajénsia autónomu sira, hala’o enkontru hodi esplika ba sira kona-ba planu realizasaun kursu hamutuk ho IDN liuhosi modulu lima (5).

Notísia Relevante: Seidauk iha Dekretu-Lei Atu Define Funsionáriu Idade Avansadu Sira

“Kursu ida-ne’e, atu oinsá kobre hodi hametin sensu no sentidu Estadu atu oinsá uniformiza komprensaun kona-ba dezenvolvimentu no konsolidasaun Estadu atu hametin liután prosesu polítika ninian, liuliu oinsá interpreta no atu tradúz polítika oriéntasaun hosi Governu ba iha polítika públika sira,”  dehan Prezidente KFP, Faustino Cardoso, ba jornalsita sira iha Ministériu Finansa, Aitarak-laran, Dili, kuarta ne’e. 

Kursu ida ne’e, nia dehan, atu hametin sentidu nasionalizmu no patriotizmu liuhosi kontestualizasaun iha terrenu hodi nune’e bele hametin liután karáter no perfil servidór públiku sira nian iha Funsaun Públiku maibé abranje hosi nivél nasionál to’o nivél Munisipál sira.

“Iha tempu badak, inísiu fulan jullu sei hahú hosi nivél nasionál ninian. Iha ne’e mak KFP hamutuk INAP no IDN atu identifika instituisaun sira ne’ebé mak tuir kalendáriu ne’ebé mak iha, futuru halo valorizasaun formasaun sira iha ámbitu dezenvolvimentu karreira funsionáriu sira iha KFP,” nia esplika.

Objetivu prinsipál, tuir nia, atu esplika formasaun ida-ne’e nu’udar komponente foun hosi formasaun sira ne’ebé mak durante ne’e hala’o, para aleinde formasaun téknika professionál aumenta tan komponente sentidu estadu espiritu nasionalizmu-patriotizmu hodi hasa’e liutan kapasidade rejiliénsia Funsaun Públika hasoru situasaun saida de’it.

Relasiona ho preokupasaun hosi diretór no funsionáriu sira ba tuir formasaun iha rai liur, Prezidente KFP hateten, buat administrasaun ne’e la’ós prefeitu hotu kedas, satán Timor-Leste hahú hosi zero ka hahú hosi Estadu Unidu (UN) mai hatúr ona tuir situasaun konkreu ita nian.  

Durante ne’e, nia hateten, formasaun seidauk sistemátiku no seidauk programadu ho di’ak maski sistema administrasaun define no hatuur tiha ona iha estrutura orgánika instituisaun hotu-hotu nian.

“Maibé kestaun implementasaun buat ketak ida. Dala balun ita hili malu no dala balun ema interpreta katak ba de’it rai liur, ba tuir formasaun iha rai liur no ninia implementasaun la másimu. Entaun, ho ida-ne’e públiku kestiona katak sira-ne’e atu pasear ka atu hamohu de’it osan Estadu nian hodi ba hala’o iha tempu anu fiskál ninian,” Prezidente KFP haktuir.

Nia dehan, ida-ne’e hanesan lisaun aprendida nune’e iha futuru tenke efikásia no kontribui duni ba dezenvolvimentu kapasidade téknika no hasa’e duni esperitu nasionalizmu-patriotizmu hodi valoriza ba buat sira ne’ebé mak iha.

Atu nune’e, nia dehan, servisu ho responsabilidade hodi hatán ba espetativa povu nian. Se servisu bazeia de’it ba imajinasaun ka tuir de’it formasaun iha rai liur nian para depois halo plau ne’ebé mak la kontestualiza.

“Ida-ne’e, ba ha’u ita halo traisaun ba povu no traisaun ba-aan rasik. Tanba ita mai hosi povu mak ba povu mak ita atu serbí bá. Se ita halo planu ida la tuir ho realidade ne’ebé mak iha mak ita la professionál,” nia dehan. 

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here