Embaixadór Xina, Xiao Jianguo entrega apoiu ekipamentu prevensaun COVID-19 ba Ministru Defeza Filomeno da Paixão de Jesus Hamutuk ho Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, Kinta (25/06). Imajen/ Egas Cristovão.

DILI, 25 Juñu 2020 (TATOLI)- Governu Repúblika  Populár Xina liuhosi sira-nia Embaixada iha Timor-Leste, ohin, entrega apoiu ekipamentu médiku no ekipamentu protesaun surtu Coronavirus ka COVID-19 ba Komandu FALINTIL-Forsa Defeza Timor-Leste (F-FDTL).

Notísia Relevante : Xina Apoiu Ekipamentu Prevensaun COVID-19 ba PN

Embaixadór Xina, Xiao Jianguo no Ministru Defeza Filomeno da Paixão de Jesus, Asina Nota Intendementu apoiu ekipamentu prevensaun COVID-19 ba F-FDTL, Kinta (25/06). Imajen/ Egas Cristovao.

Ekipamentu ne’e entrega direita hosi Embaixadór Xina mai Timor-Leste, Xiao Jiangou, ba Majór Jenerál Lere Anan Timor akompaña husi Ministru Defeza, Filomeno da Paixão de Jesus, Adidu Defeza Xina mai Timor-Leste, Koronél Huang Damin no Kkomandante F-FDTL sira iha Kuartél Jerál F-FDTL, Fatuhada, Dili.

Embaixadór Xina ba Timor-Leste, Xiao Jiangou dehan, apoiu ne’e hodi ajuda membru F-FDTL halo protesaun ba sira-nia aan luta kontra COVID-19 iha Timor-Leste.

“Ohin hanesan onra boot ida ba ha’u hodi entrega doasaun ekipamentu ida ne’e husu Ministériu Defeza Xina hodi apoiu ekipamentu ne’e ba Ministériu Defeza Timor-Leste hodi ajuda Komandu F-FDTL,” dehan Embaixadór Xiao Jiangou.

Apoiu ne’e Xina oferese, hafoin Governu Timor-Leste no Komandu F-FFTL hato’o proposta apoiu ba Governu Xina, foin lalais ne’e.

Embaixadór Xina ne’e mós orgullu no agradese tebes ba esforsu Governu Timor-Leste iha rejiaun ASEAN ne’ebé susesu luta kontra COVID-19 ne’ebé rejista too pasiente 24, maibé ema hirak ne’e nia saúde rekupera   no la iha ema ruma maka mate.

“Ha’u kongratula ita boot sira-nia konkista hodi luta kontra COVID-19 ho susesu,” nia agradese.

Xina kontinua apoiu nafatin Timor-Leste hodi luta kontra COVI-19, tanba apoiu ne’e nu’udar amizade profunda entre Xina ba Timor-Leste.

Notísia Relevante: Xina Kontinua Promete Tulun TL Kombate COVID-19

Apoiu ne’ebé Xina oferese maka hanesan, Máskara médiku deskartável hamutuk 20.000, máskara hamutuk 3000, máskara protesaun KN95 3000, oklu protesaun 2.100, eskudu protetór 1.500, ropa protesaun 1.500, ropa protesaun husi bee 1.500, sapatu 3.000, luvas médiu kaixa 30 no testeksaun temperature 20.

Ekipamentu sira-ne’e nu’udar parte ida husi kooperasaun anti COVID-19 entre Liberasaun Populár Arma Xineza (PLA) no F-FDTL. PLA mós realiza ona vídeo konferénsia kona-ba troka esperiénsia iha prevensaun.

Iha fatin hanesan, Majór Jenerál Lere Anan Timor, lori komandu F-FDTL nia naran hato’o agradese ba apoiu ne’e.

“Ita nia amizade hatudu iha situasaun ida ne’ebé difisil, COVID-19 akontese iha mundu tomak bolu atensaun mundu tomak hodi ajuda malu. Iha mundu seidauk iha ai-moruk atu kontra COVID-19, úniku ai-moruk maka halo prevensaun ba vítima sira. Ami hato’o ami nia sentidu kondolénsia ba vítima COVID-19 ne’ebé mate iha Xina no nasaun seluk,” Lere hateten.

Major Jenerál Lere hatutan, COVID-19 ne’ebé Xina hasoru hodi hada’et ba mundu tomak la’ós buat ida fasil, tanba ema barak mate no atividade barak iha mundu paradu. Situasaun ne’e ezije nasaun hotu hodi buka ajuda malu oinsá salva povu no nasaun husi situasaun perigu nia laran.

“Ami rekoñese Governu Xina luta kontra COVID-19 la’ós buat fasil, nune’e mós hasoru situasaun ne’e, too ikus Governu Xina no nasaun seluk sempre ajuda ami nu’udar agradesimentu boot ida ba ami,” Lere agradese.

Komandante Lere espera, matenek sira iha mundu sei hamutuk hodi deskobre ai-moruk hodi salva ema hotu iha mundu.

“Ha’u lori Komandu F-FDTL no povu nia naran hato’o agradese ba povu Xina ne’ebé apoiu ami iha situasaun difisil no apoiu ha’u nia militár ne’ebé tuir hela kursu iha Xina hodi tau matan nafatin ba sira,” nia hateten.

Iha fatin hanesan, Ministru Defeza, Filomeno da Paixão de Jesus, lori Governu Timor-Leste nia naran hato’o agradese ba Governu Xina nia apoiu.

“Xina nu’udar amigu di’ak ida ba Governu Timor-Leste hodi responde ami nia pedidu no preokupasaun atu luta kontra COVID-19,” Ministru Filomeno Paixão agradese.

Governu Timor-Leste kontinua servisu hamutuk ho parseiru internasionál hanesan Organizasaun Saúde Mundiál (OSM) no korpu diplomátiku sira ne’ebé apoiu fundus no materiál COVID-19 nian.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here