Ministru Agrkultura Peska, Pedro Reis (loos) dada lia ho Vise-Ministru Agrikultura no Peskas, Abilio Xavier de Araújo no Sekretáriu Estadu Peskas, Elídio de Araújo, hafoin enkontru koordenasaun ho dirijente MAP, iha edifísiu MAP, Comoro, kinta (25/06). Imajen/Mídia-MAP

DILI, 25 juñu 2020 (TATOLI) Sekretáriu Estadu Peskas, Elídio de Araújo, hateten nu’udar membru governu foun, nia parte iha ona programa prioridade hitu ba área peska nian atu implementa durante nia mandatu.

“Ha’u iha programa hitu hanesan, sei kria rekursu ne’ebé maka di’ak liuhosi treinamentu hodi asegura no fortika seguransa marítima ba ita-nia rikeza tasi laran hanesan ikan ahu-ruin no duut-tasi ne’ebé maka nia folin boot iha merkadu nasionál no internasionál,” dehan Sekretáriu Estadu Elídio iha salaun Ministériu Agrikultura no Peskas (MAP), Comoro, kinta ne’e.

Programa daruak maka kria kondisaun ne’ebé maka sustentável ba peskadór sira ne’ebé maka moris iha tasi ibun ho dignu, ho sira-nia família no sai parseiru Governu nian

Datoluk maka sei kria merkadu ikan tasi no ikan bee-midar ho folin baratu ba ema hotu atu ema bele konsumu ikan fresku no datoluk sei hapara importasaun ikan fresku ka matak husi rai-li’ur ne’ebé konsidera ikan iha rai-laran la folin.

Programa dalimak maka sei fó informasaun ba timor-oan sira hodi hatoman konsumu ikan hanesan ai-han sira seluk tanba ikan iha nutrisaun ne’ebé di’ak ba ema-nia kakutak no saúde.

Nune’e mós, programa daneen maka sei kria koopersaun forte ho emprezáriu sira tantu nasionál no internasionál, ne’ebé iha esperiénsia iha área peska nia hodi fabrika ikan kalen iha rai-laran.

“Nune’e iha futuru ita mós bele fa’an ikan ho produtu tasi laran nia ba nasaun seluk,” nia akresenta.

Ikus liu, programa dahitu maka sei kria planu nasionál ida hodi halo prevensaun no represaun ba atividade peska ilegál sira ne’ebé perkore daudaun iha Tasi Timór.

“Kona-ba asuntu peska ilegál, ita presiza ekipamentu adekuandu no liña servisu ho ministeriu sira seluk”, tenik Elídio.

Nia rekoñese, atu realiza programa hirak ne’e presiza fundu no rekursu unanu inklui presiza hanoin no matenek atu konkretiza.

“Estadu no Governu mesak sei labele halo buat ida, sá tan Sekretariu Estadu nu’udar parte ki’ik ida labele ezerse servisu boot sein kria servisu interministeriál no parseiru sira seluk. Tanba ne’e Sekretaria Estadu ne’e sei esfosu hodi servisu no  koopera ho parte hotu hodi realiza planu Governu nian ho susesu,” nia subliña.

Parte seluk, governante ne’e promete sei la sobu saida mak iha ona institusaun ne’e no sei servisu hamutuk ho parte hotu atubele konketiza prioridade hitu ne’ebé maka iha.

“Ha’u mai la’ós atu sobu, maibé atu kompleta de’it no halo di’ak liután servisu ne’ebé durante ne’e la’o ona, atu realiza planu sira ne’ebé iha no bele alkansa,” Sekretáriu Estadu ne’e realsa.

Iha biban hanesan, Vise-Ministru Agrikultura no Peskas, Abilio Xavier de Araújo ne’ebé maka hala’o ona kna’ar ba dahuluk, hateten nia parte kompromete sei servisu hamutuk ho Ministru Agrkultura Peska, Pedro Reis inklui Sekreáriu Estadu Elídio hodi aselera prosesu servisu iha ministeriu rasik.

“Konserteza ita mai atu haree buat ne’ebé interese komum no agora xave ba interese ne’e maka presiza fuan nakloke ba malu, iha koopersaun servisu no tenke servisu ba rai doben Timor-Leste hodi povu bele moris di’ak,” nia subliña.

Governante ne’e husu ba funsionáriu hotu atu loke laran ba malu.

“Ita bele mai husi kór partidu ida-idak, maibé bainhira ita tama iha ne’e ita mesak ponte ida ba povu hodi lori desenvolvimentu ne’ebé di’ak ba povu no rai,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here