Imajen/Doc. Tatoli

DILI, 25 juñu 2020 (TATOLI)–Governu liuhosi Ministériu Solidaridade Sosiál no Inkluzaun (MSSI) fó kontrata ba Kompañia Mishra Unipesoal, Lda, hodi apoiu karreta hamutuk 148 ba ekipa pagamentu subsídiu iha munisípiu 12 la inklui Rejiaun Administrativa Espesiál Oé-Cusse Ambeno (RAEOA).

Operasionál Manajer Kompañia Mishra Unipesoal, Lda, Sergio Campos dos Santos, informa Governu fó kontrata karreta ba na’in ba kompañia ne’e ba kada karreta ida iha loron ida ho folin $135, inklui ona ho nia akomodasaun no motorista ne’ebé lori kareta ne’e.

“Ami-nia kareta ida ba kada loron ida ne’e ho presu $135, hahú hosi loron 7-23 juñu 2020. Bainhira ekipa pagamentu finaliza ona pagamentu iha munisípiu sira, Governu entrega kedas ona kareta ne’e mai ami iha tersa-hori bainrua,” dehan Operasionál Manajer Kompañia Mishra Unipesoal, Lda, Sergio Campos dos Santos, ba jornalista sira iha nia servisu fatin, Aimutin, Dili, kinta ne’e.

Nia haktuir, iha karta kontrata nia laran ne’e to’o loron-14 maibé Governu fó no selu tuir tempu de’it. Bainhira pagamentu hotu sedu, nia dehan, entaun kontrata no selu mós tuir tempu ne’e.

“Tanba relatóriu sira ne’e, sei hato’o ba Ministériu relevante sira bazeia ba ekipa pagamentu MSSI nia relatóriu sira iha munisípiu 12 ne’e,” nia hateten. 

Nia hateten, totál kareta ne’ebé mak kompañia iha hamutuk 148 maibé kompañia ne’e nian rasik iha karreta unidade 12 de’it.

“Ami-nia kareta loloos ne’e hamutuk unidade 12 de’it no restante ne’e kareta privadu hosi kolega no família nian, nune’e ami bolu hodi kontrata fila fali kareta hirak ne’e mak hodi tula ekipa pagamentu ba munisípiu sira. Maibé hahan no motorista sira, ami mak responsabiliza hotu,”  nia dehan.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here