Primeiru-Ministru, Taur Matan Ruak, hafoin fó pose ba membru Komisaun Elaborasaun Planu Rekuperasaun Ekonómika iha Salaun PCM, Palásiu Governu, kinta (18/06). Imajen Tatoli/António Gonçalves

DILI, 24 juñu 2020 (TATOLI) – Prezidente Repúblika Francisco Guterres ‘Lú- Olo’ enkoraja Komisaun Rekuperasaun Ekonómika ne’ebé maka iha kna’ar prepara planu ba rekuperasaun ekonómika atubele kontribu hasa’e kreximentu ekonómiku no hadi’ak povu nia moris ne’ebé afetadu ho kondisaun polítika no finaseiru no surtu COVID-19.

“Ha’u saúda Primeiru-Ministru hili profisionál sira hodi halo parte Komisaun ba Rekuperasaun Ekonómika. Ha’u enkoraja sira atu hala’o sira-nia kna’ar tuir ita-nia realidade, haktuir ita-nia sosiedade ninia nesesidade rasik no atu kontribui hadi’ak moris-di’ak ba sidadaun hotu,” tenik Xefe Estadu liuhosi diskursu iha serimónia pose ba Membru Governu na’in-21, iha Palásiu Prezidensiál, Bairro Pité, kuarta ne’e.

Nia nota katak situasaun polítika no surtu COVID-19 obriga atu hili dalan inkluzaun, diálogu permanente, respeitu ba ema seluk nia hanoin, kapasidade atu servisu hamutukho neon, liuliu ba moris-di’ak ba povu tomak ne’ebé la´ós de’it ba interese ida-idak nian.

“Ita presiza hanoin filafali oinsá hala’o dezenvolvimentu nasionál. Urjente tebes atu hala’o atividade produtiva, hamosu empregu no hasa’e rendimentu iha rai-laran. Ita tenke diversifika ita-nia ekonomia no kria kondisaun atu haburas liután ekonomia ba beibeik,” PR akresenta.

Tuir Xefe Estadu, preparasaun ba planu rekuperasaun ekonómiku la’ós depende de’it ba koñesimentu sientífiku no tékniku maibé tenke  konta mós ho esperiénsia no partisipasaun husi instituisaun hanesan sosiedade sivíl, setór privadu no komunidade sira no parseiru dezenvolvimentu sira.

Iha sorin seluk, Primeiru-Ministru, Taur Matan Ruak, konsidera Timor-Leste hasoru susesu boot tanba hetan apoia husi parseiru dezenvolvimentu  sira hodi kombate pandemia.

“Ita kontente tanba to’o ohin loron ita seidauk rejistu ema ne’ebé mate tanba moras ne’e no ita konsege ona kontrola surtu ne’e hodi evita atu moras ne’e la hada’et livre iha rai Timor-Leste,” nia subliña.

PM Taur dehan daudaun ne’e Governu buka meiu atu kria estabilizasaun no rekuperasaun ekonómika efetiva balun iha país hodi responde ba situasaun urjente sira hanesan dezastre naturál no kalamidade públika sira.

Kriasaun Komisaun Elabora Planu Rekuperasaun Ekonómika bazeia ba Projetu Rezolusaun Governu, ne’ebé aprezenta husi Xefe Governu iha reuniaun ordinária Konsellu Ministru iha 10 juñu no hetan ona aprovasaun.

Iha 18 juñu, PM Taur fó pose ba estrutura komisaun ne’ebé kompostu husi Prezidente Komisaun, Rui Augusto Gomes no ninia vogál na’in-haat maka Rui Maria de Araújo, Manuel Vong, Carlos da Silva Lopes Saky, no Berta Montalvão.

Komisaun ne’e iha durasaun servisu durante loron 60 hodi elaborasaun planu no aprezenta ba Konsellu Ministru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here