Sekretáriu Estadu Protesaun Sivíl emposadu, Joaquim José Gusmão dos Reis Martins. Imajen Tatoli/António Gonçalves

DILI, 24 juñu 2020 (TATOLI) – Sekretáriu Estadu Protesaun Sivíl emposadu, Joaquim José Gusmão dos Reis Martins, konsidera asume kargu ida atu serví povu, la’ós atu ukun tanba ne’e nia sei asume kargu ne’e ho responsabilidade.

Antes ne’e, iha loron 28 maiu, Prezidente Repúblika ezonera Membru Governu na’in-tolu, inklui Joaquim José husi kargu Ministru Agrikultura no Peska hodi substitui Pedro Reis.

“Ba ha’u kargu ne’e la importante, importante ba ha’u mak serví povu liuhosi meiu saida de’it ka kargu saida de’it. Bainhira sai Ministru tiha maka tun fali mai Sekretáriu Estadu laiha problema, tanba ha’u nia objetivu mak serví povu ho fuan no laran tanba ita hetan kargu atu servi, la’ós atu ukun,” tenik governante ne’e hafoin simu pose iha Palásiu Prezidensiál, Bairro Pité, kuarta ne’e.

Sekretáriu Estadu sesante, Alexandrino de Araújo iha kinta ne’e sei hala’o termu entrega servisu ba atuál Sekretáriu Estadu.

Tuir nia, Sekretaria Estadu Protesaun Sivíl (SEPS) daudaun ne’e sei halo preparasaun Orsamentu Jerál Estadu (OJE) 2020 no 2021 no Dekretu-Lei Protesaun Sivíl ne’ebé Konsellu Ministru aprova atu submete ba Parlamentu Nasionál atu halo diskusaun no aprovasaun.

“Planu orsamentál ha’u tenke rona filafali briefing husi Sekretáriu Estadu Protesaun Sivíl sesante atu aumenta ka hamenus tanba ha’u seidauk iha relatóriu,” nia akresenta.

Nune’e mós, Joaquim José subliña sei foku mós ba Bombeiru, Diresaun Protesaun Konflitu no Diresaun Dezastre Naturál atu hamutuk serví populasaun ho di’ak.

“Ha’u mesak sei labele, maibé sei hamutuk ho tékniku sira no ha’u iha konfiasa katak bele lori instituisaun ne’e ho di’ak hodi serví povu,” nia garante.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here